ԵՐԵՎԱՆ, 20 ապրիլի – Sputnik. Հայաստանի նախկին առաջնորդների ներկայացուցիչներն արձագանքել են նրանց` քաղաքականությունից հեռանալու մասին մամուլում հրապարակվող լուրերին: ՀՀ երկրորդ նախագահ Ռոբերտ Քոչարյանի գրասենյակի համակարգող Բագրատ Միկոյանը Sputnik Արմենիայի թղթակցին հայտնեց, որ Ռոբերտ Քոչարյանը հումորով է վերաբերվում «Հրապարակ» թերթի` «մտքի կանոնավոր վարժություններին», և որ իր «հեռանալու» մասին նա իմացել է հենց թերթից։
Ավելի վաղ թերթը հայտնել էր, որ ՀՀ նախկին նախագահներն ուզում են լքել քաղաքական ասպարեզը` էստաֆետը երիտասարդներին փոխանցելով։
«Հրապարակի» տվյալներով` երրորդ նախագահ Սերժ Սարգսյանն առաջիկա օրերին մտադիր է հանդես գալ քաղաքական ասպարեզից հեռանալու մասին հայտարարությամբ:
Նշվում էր, որ քննարկումներ են ընթանում նախորդների՝ Լևոն Տեր–Պետրոսյանի և Ռոբերտ Քոչարյանի հետ, որպեսզի նրանք ևս ստորագրեն այդ հայտարարության տակ, և որ երկրորդ նախագահն իբր դեմ չէ։
Իր հերթին «Հայ ազգային կոնգրես» կուսակցության ղեկավարի տեղակալ Լևոն Զուրաբյանը մեր պարբերականին տված մեկնաբանությունում փաստացի հերքեց Լևոն Տեր-Պետրոսյանի հետ որևէ քննարկման մասին տեղեկությունը։ Թերթի հրապարակումն էլ անվանեց «փուչիկ», որն արժանի չէ լուրջ քննարկման։ Երրորդ նախագահի գրասենյակի հետ կապ հաստատել չհաջողվեց։
Հետաքրքիր է, որ դեռ 2021 թվականի մայիսին նման գաղափար հնչեցրեց հենց Հայաստանի առաջին նախագահ Լևոն Տեր-Պետրոսյանը։ Խորհրդարանական ընտրություններից 1 և կես ամիս առաջ նա Քոչարյանին և Սարգսյանին առաջարկել էր միասնական համամասնական ցուցակով միասին մասնակցել «Ազգային համաձայնության ալյանս» դաշինքի կազմում, սակայն պայմանով, որ հաղթանակից հետո նրանցից ոչ մեկը պետական պաշտոն չի զբաղեցնի։ Առաջին նախագահի առաջարկը մյուսները մերժել էին։