ԵՐԵՎԱՆ, 19 ապրիլի – Sputnik. ՀՀ երկրորդ նախագահ Ռոբերտ Քոչարյանի պաշտպան Արամ Օրբելյանը լքեց դատական նիստերի դահլիճը՝ բոյկոտելով դատավորի գործողությունները։
Ավելի վաղ հայտնել էինք, որ Երևանի ընդհանուր իրավասության դատարանում շարունակվում է Քոչարյանի ու ՀՀ նախկին փոխվարչապետ Արմեն Գևորգյանի գործով դատական նիստը, որը նախագահում է դատավոր Աննա Դանիբեկյանը։
Օրբելյանն առաջարկեց դատարանին նախ քննարկել իր` քրեական գործը կարճելու միջնորդությունը, իսկ Դանիբեկյանը պնդեց, որ պետք է անցնի ապացույցների հետազոտմանը։ Օրբելյանը հայտարարեց, որ կլքի նիստերի դահլիճը։
Մեղադրող դատախազ Պետրոս Պետրոսյանը նույնպես պնդեց, որ դատարանն անցնի ապացույցների հետազոտմանը։
«Ապացույց չի կարող հետազոտվել մի գործում, որտեղ ապացույց չկա։ Դատավարությունը չի կարող հասնել ապացույցների հետազոտման փուլ, քանի դեռ չի գործը նախապատրաստված չէ»,- ասաց Օրբելյանը` լքելով նիստերի դահլիճը, սակայն խոստացավ, որ եթե նիստը շարունակվի, ապա կվերադառնա։
Դատավոր Աննա Դանիբեկյանը հայտարարեց, որ առանց Օրբելյանի նիստը չի կարող շարունակվել, և հեռացավ խորհրդակցական սենյակ՝ վերջինիս նկատմամբ դատական սանկցիայի հարցը քննարկելու։
Հիշեցնենք` ՀՀ երկրորդ նախագահ Ռոբերտ Քոչարյանն ու նախկին փոխվարչապետ Արմեն Գևորգյանը քրեական գործով անցնում են որպես մեղադրյալներ։ Քոչարյանը մեղադրվում է առանձնակի խոշոր չափերով կաշառք ստանալու, իսկ Գևորգյանը` փողերի լվացման մեջ։