ԵՐԵՎԱՆ, 18 ապրիլի – Sputnik․ՀՀ հակակոռուպցիոն կոմիտեն պարզել է, որ Լոռու մարզի Գյուլագարակ համայնքի ղեկավարը, նրա ընտանիքի անդամը և համայնքի ղեկավարի տեղակալը 2020թ. տարեկան հայտարարագրերում առանձնապես խոշոր չափերով գույքի և եկամուտների վերաբերյալ տվյալներ են թաքցրել, հայտնում է ՀՀ գլխավոր դատախազությունը:
Հարուցված քրեական գործի շրջանակում պարզվել է, որ համայնքի ղեկավար Մ.Գ.-ն թաքցրել է հայտարարագրման ենթակա՝ իր անվամբ գրանցված Լոռու մարզի Ագարակ համայնքի Լոռի Բերդ և հիմնականում Կուրթան գյուղերում գտնվող 11 հողամասերը, որոնց զուտ կադաստրային արժեքի հանրագումարը կազմում է 2,5 մլն ՀՀ դրամ: Նա թաքցրել է նաև իրեն պատկանող «LEXUS GX 470» մակնիշի ավտոմեքենան, «Գետավան» ՍՊԸ-ում ունեցած բաժնեմասը: Բացի այդ, Մ.Գ.-ն չի հայտարարագրել աշխատավարձի տեսքով 2020թ. ստացած եկամտից 2.822.648 ՀՀ դրամը:
Մ.Գ.-ի ազգական Թ.Բ.-ն տարեկան հայտարարագրում թաքցրել է Լոռու մարզի Կուրթան գյուղում գտնվող 11 հողամասերը, որոնց զուտ կադաստրային արժեքի հանրագումարը կազմում է 9.514.256 ՀՀ դրամ: Բացի այդ, վերջինս չի հայտարարագրել նաև 2020թ. ընթացքում իր հաշիվներում ունեցած ընդհանուր 20.898.491 ՀՀ դրամ գումարը:
Գյուլագարակ համայնքի ղեկավարի տեղակալ Ռ.Վ.-ն թաքցրել է հայտարարագրման ենթակա 3 հողամասերը, իրեն տրամադրված 1.350.000 ՀՀ դրամ վարկը, ինչպես նաև 4.237.134,3 ՀՀ դրամի չափով եկամուտը:
2022թ. ապրիլի 2-ին նշված երեք անձանց վերջնական մեղադրանքներ են առաջադրվել ՀՀ քրեական օրենսգրքի 314.3 հոդվածի 2-րդ (հայտարարագրերում կեղծ տվյալ ներկայացնելը կամ հայտարարագրման ենթակա տվյալը թաքցնելը) մասով:
Քրեական գործով նախաքննությունն ավարտվել է, քրեական գործը ուղարկել է Երևան քաղաքի ընդհանուր իրավասության առաջին ատյանի դատարան: