ԵՐԵՎԱՆ, 17 ապրիլի – Sputnik. Ազատության հրապարակում լարված իրավիճակ է։ Քիչ առաջ քաշքշուկ տեղի ունեցավ ոստիկանների ու ակցիայի մասնակիցների միջև՝ նախ, երբ ակցիայի մասնակիցները փորձեցին վրաններ տեղադրել, ապա այն բանից հետո, երբ նրանք փորձեցին հարակից փողոցը փակել։
«Մենք պետք է այստեղ վրաններ տեղադրենք։ Տեսաք, որ ոստիկանները անհասկանալի կերպով եկան ու հարձակվեցին մեզ վրա։ Ինձ ասացին, որ ոստիկանները ոնց որ առևանգել են, գողացել են մեր վրանները»,- լրագրողների հետ զրույցում նշեց ՀՀ ԱԺ «Պատիվ ունեմ» խմբակցության ղեկավար Արթուր Վանեցյանը։
Նրա խոսքով՝ ոստիկանների արձագանքը «լավ» է, նշանակում է՝ իրենք ճիշտ ճանապարհի վրա են։ Շեշտեց՝ տուն չեն գնալու, մնալու և պայքարելու են։
«Գործողությունները լինելու են շարունակական։ Իմ հայտարարությունից հետո շատ մարդիկ եկան։ Անկեղծ ասած, չէի սպասում, որ այսքան կգան։ Յուրաքանչյուր անձից է կախված՝ մենք ունենալո՞ւ ենք հաղթանակ, թե՞ ոչ։ Իսկ այդ հաղթանակը ոչ թե իշխանության համար է, ոչ թե նեղ անձնական նպատակի համար է, այլ բոլորի համար է»,- հայտարարեց Վանեցյանը։
Նա նշեց, որ իրենք հրապարակ չեն եկել կուսակցական դրոշներով, և եկել են պայքարելու հանուն հայրենիքի։
«Հայրենիք» կուսակցության քաղխորհրդի անդամ Արսեն Բաբայանի խոսքով՝ բերման են ենթարկվել 4 կամ 5 անձինք։ Ասաց՝ սպասում են, որ բերման ենթարկվածներին ազատ արձակեն, ինչպես նաև իրենց վրանները վերադարձնեն։
Նշենք, որ Ազատության հրապարակում և հարակից հատվածներում մեծ թվով ոստիկանական ուժեր են կուտակվել։ Նրանք քաղաքացիների բերման ենթարկեցին ուժի կիրառմամբ՝ առանց նախազգուշացման։ Ի պատասխան ոստիկանների գործողությունների՝ ակցիայի մասնակիցները սկսեցին բղավել «Նիկո՛լ, դավաճա՛ն»։
Հիշեցնենք, որ ժամեր առաջ Վանեցյանը ֆեյսբուքյան ուղիղ եթերում կոչ արեց բոլորին գնալ Ազատության հրապարակ՝ նշելով, որ ինքը մնալու է այնտեղ։