ԵՐԵՎԱՆ, 15 ապրիլի – Sputnik. Ռուս զինվորականներն այսօր առավոտյան խոցել են ուկրաինական 2 «Տոչկա-Ու» հրթիռներ, որոնք արձակվել էին Կախովսկայա ՀԷԿ-ի ուղղությամբ։ Այս մասին այսօր հայտարարել է ՌԴ ՊՆ պաշտոնական ներկայացուցիչ, գեներալ-մայոր Իգոր Կոնաշենկովը։
«Մոսկվայի ժամանակով առավոտյան ժամը 7-ի սահմաններում ուկրաինական 19-րդ առանձին հրթիռային բրիգադի դիվիզիոնը «Տոչկա-Ու» մարտավարական 2 հրթիռով հարված է հասցրել Կախովսկայա ՀԷԿ-ին։ Հարվածի հետևանքով փլուզվել է ՀԷԿ-ի ամբարտակը, ինչը պետք է հանգեցներ Դնեպրի ջրերի անկառավարելի հոսքի և մարդկանց հետ միասին ջրի տակ թողներ Խերսոնի շրջանի մի շարք բնակավայրեր` խանգարելու համար ՌԴ ԶՈւ գործողությունները։ Երկու հրթիռները խոցվել են օդում ռուսական ՀՕՊ-ի միջոցներով», ասել է գեներալը։
Կոնաշենկովը նշել է, որ հրթիռներից մեկի բեկորներն ընկել են Խերսոնի շրջանի Նովայա Կախովկա բնակավայրում, ինչի հետևանքով մանկապարտեզ և բնակելի տներ են վնասվել։
«Վնասվածք են ստացել կին և երեխա, որոնց ռուս զինծառայողները տեղում ցուցաբերել են առաջին բուժօգնություն։ Ներկա պահին նրանց հիվանդանոց են տեղափոխել»,- նշել է գեներալը։
ՊՆ-ի տվյալներով` օրվա ընթացքում բարձր ճշգրտության հրթիռներով օդից խոցվել է ուկրաինական զորքերի 10 ռազմական օբյեկտ։
Հարվածների հետևանքով ոչնչացվել են ուկրաինական զորքերի առանձին մեքենայացված բրիգադների 81-րդ և 93-րդ ստորաբաժանումների կենտրոնացման երեք տարածք Բարվենկովո, Կրամատորսկ և Լիսիչանսկ բնակավայրերում, Օդեսայի մարզի Պովստանսկոյե բնակավայրում և Նովոելիզավետովկայում` ուկրաինական ռազմական տեխնիկայի և սպառազինության կենտրոնացման երկու վայր, Պարուտինո և Նիկոլաև բնակավայրերի շրջանում` հրթիռահրետանային սպառազինության պահեստներ, Յասենովոյում և Սրիբնոյում` ազգայնական խմբավորումների տեղակայման կետեր։
Ինչպես նշել է ՌԴ ՊՆ պաշտոնական ներկայացուցիչը` ռուսական հրթիռային զորքերն ու հրետանին Ուկրաինայում 217 ռազմական օբյեկտ են ոչնչացրել, ավիացիան` վեց։
Նրա խոսքով` օպերատիվ-մարտավարական ավիացիան օրվա ընթացքում ոչնչացրել է ուկրաինական 6 ռազմական օբյեկտ, այդ թվում` հրետանային մարտկոց, համազարկային կրակի ռեակտիվ համակարգի կայանք, հրթիռահրետանային սպառազինության պահեստներ և անձնակազմի ու տեխնիկայի կենտրոնացման վայրեր։
Բացի այդ, անցած մեկ օրվա ընթացքում Օկտյաբրսկի բնակավայրի շրջանում ռուսական ՀՕՊ-ը խոցել է Տու-143 «Ռեյս» ուկրաինական հետախուզական անօդաչուն։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Հատուկ գործողության նպատակը Ուկրաինայի ապառազմականացումն է ու ապաազգայնականացումը, ինչպես նաև նրան չեզոքության մղելը։
Ուկրաինայում մարտական գործողությունները շարունակվում են։