ԵՐԵՎԱՆ, 13 ապրիլի – Sputnik. Հայաստանի արտգործնախարար Արարատ Միրզոյանի հեռախոսազրույցը նրա ադրբեջանցի գործընկերոջ ապրիլի 11-ին տեղի է ունեցել Ադրբեջանի արտգործնախարար Ջեյհուն Բայրամովի նախաձեռնությամբ։ Այս մասին այսօր ԱԺ–ում կառավարության հետ հարցուպատասխանի ժամանակ հայտնեց ՀՀ ԱԳ նախարար Արարատ Միրզոյանը` որոշ մանրամասներ բացահայտելով այդ զրույցից։
«Քննարկել ենք այն, ինչ վերջին 2 տարվա ընթացքում քննարկվել ու արձանագրվել է նաև Բրյուսելում` երկու երկրների ղեկավարների հանդիպման արդյունքներով։ Այն է` սահմանազատման ու սահմանային անվտանգության հարցերով հանձնաժողովի ստեղծման մեխանիզմները, ինչպես նաև Հայաստանի և Ադրբեջանի միջև կնքվելիք ենթադրյալ կարգավորման պայմանագրին ուղղված բանակցությունների մեկնարկի շուրջ երկու կողմերի պատկերացումները»,- ասաց Միրզոյանը։
Հիշեցնենք` հեռախոսազրույցը տեղի էր ունեցել ապրիլի 11-ին` բրյուսելյան հանդիպումից օրեր անց։
Բայրամովն ավելի վաղ հայտնել էր, որ իրենք հարաբերությունների կարգավորման 5 կետից բաղկացած առաջարկ են արել Հայաստանին։ Նշվում էր, որ ադրբեջանական կողմը պատրաստ է Հայաստանի հետ խաղաղության պայմանագիր կնքելու բանակցություններին, եթե պաշտոնական Երևանն ընդունի այդ 5 կետը։
Հայաստանի և Ադրբեջանի հանրապետությունների միջև խաղաղության պայմանագրի կնքման նպատակով բանակցություններ կազմակերպելու համար ՀՀ-ն դիմել է ԵԱՀԿ ՄԽ համանախագահությանը։