ՌԴ ՊՆ մամուլի ծառայությունը հայտնում է, որ Մարիուպոլի շրջաններից, որոնք մնում են ուկրաինացի ուժայինների թիրախում, մեկ օրում ավելի քան 80 բնակիչ է տարհանվել։
Մասնավորապես՝ ՌԴ ԶՈւ և ԴԺՀ ժողովրդական միլիցիայի զինծառայողները տարհանել են Մարիուպոլի Լևոբերեժնայա շրջանի խաղաղ բնակիչներին։ Այնտեղ դեռ կրակոցների վտանգ կա:
Նախարարությունում պարզաբանել են, որ մեկ օրում շփման գծի մոտ գտնվող բնակելի տների նկուղներից դուրս են բերվել քաղաքի ավելի քան ութ տասնյակ բնակիչներ, այդ թվում՝ 14 երեխա:
Ուկրաինացի զինվորականների կրակի տակից բնակիչներին անվտանգ տարհանելու համար օգտագործվել են ԲՄՊ-1 հետևակի մարտական մեքենաներ ու զրահամեքենաներ: Բացի այդ, տարհանման ջոկատները քողարկվել են ծխի օգնությամբ։
Նշվում է, որ բոլոր մարդիկ տեղափոխվել են ապահով վայրեր։ Գնդակոծություններից տուժած բնակիչներին բուժօգնություն է ցուցաբերվել։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ուկրաինայում մարտական գործողություններն ընթանում են արդեն 45–րդ օրը։