ԵՐԵՎԱՆ, 7 ապրիլի – Sputnik. ԶՊՄԿ–ում հասունացող բունտի վերաբերյալ տեղեկատվությունը չի համապատասխանում իրականությանը և կոմբինատում արտադրական աշխատանքներն ընթանում են սովորական ռեժիմով։ Sputnik Արմենիայի հետ զրույցում այս մասին ասաց «Գեոպրոմայնինգ» ընկերության ՀՀ–ում հասարակայնության հետ կապերի պատասխանատու Ռուզաննա Գրիգորյանը։
Նշենք, որ ԶՊՄԿ-ի գործունեությանը վերաբերող տեղեկությունները հայաստանյան մամուլում մեծ տարածում են գտել, թեև, ըստ ԶՊՄԿ-ի, դրանց սկզբնաղբյուրը «Փաստ» թերթի ս.թ. ապրիլի 5–ի հրապարակումն է եղել։
Թթու թան չէ, ամեն մարդու բան չէ
© Փաստ
Ռուզաննա Գրիգորյանի հավաստմամբ` մարդիկ գալիս են աշխատանքի, հանգիստ պայմաններում աշխատում և որևէ խոչընդոտի չեն բախվում, հետևաբար զանգվածային դժգոհության կամ բողոքի մասին մամուլի հրապարակումները կոմբինատում նույնիսկ զարմանք են առաջացրել։
«Կոմբինատը շարունակում է աշխատել տարեկան արտադրական պլանի համաձայն։ Ներկայում ձեռնարկությունը շարունակում է իրականացնել կառավարման արդյունավետության բարձրացման ծրագիրը, որն արդեն իսկ դրական ազդեցություն է ունեցել ընդհանուր գործունեության վրա, այդ թվում` ՀՀ պետական բյուջե վճարվող հարկերի մասով»,– մանրամասնեց «Գեոպրոմայնինգ» ընկերության Հայաստանում հասարակայնության հետ կապերի պատասխանատուն։
Նշենք, որ ըստ մամուլի` Զանգեզուրի պղնձամոլիբդենային կոմբինատում հերթական բունտն է հասունանում։ Աշխատակիցները որոշել են ընդվզել ներկայիս տնօրինության դեմ, քանի որ արտադրական ծավալները նվազել են, կոմբինատում էլ անկառավարելի վիճակ է ստեղծվել։
Ռուզաննա Գրիգորյանը հրապարակված տեղեկությանը հակադարձում է.
«Նախկին սեփականատերերի օրոք ԶՊՄԿ-ն ուներ անարդյունավետ և ոչ թափանցիկ կառավարման համակարգ, որը թույլ էր տալիս բազմաթիվ չարաշահումներ իրականացնել։ Նոր թիմը զգալի աշխատանք է կատարել ընկերության գործունեության արդյունավետությունը բարելավելու, ինչպես նաև գործունեությունը բացարձակ թափանցիկ դարձնելու ուղղությամբ»։
Նրա խոսքով` կոմբինատում այժմ գնումներն իրականացվում են մրցութային կարգով, իսկ նախկին ոչ թափանցիկ «միջնորդներին» հեռացրել են։ Վերանայվել են հիմնական առևտրային պայմանագրերը` շուկայական պայմաններին համապատասխան, որի արդյունքում գները զգալի նվազել են։
Մամուլը նաև գրում է, որ եթե նախկինում ԶՊՄԿ-ն օրական800-1400 տոննա խտանյութ էր արտահանում, հիմա այդ ցուցանիշն ընդամենը 300-350 տոննա է, ինչն էլ, ըստ նույն աղբյուրի, աշխատակիցների շրջանում դժգոհությունների է հանգեցրել։
Արտադրական ծավալների նվազման մասին լուրերը մեր զրուցակիցը նույնպես ապատեղեկատվություն որակեց` հայտնելով, որ ԶՊՄԿ–ի 2022 թվականի արտադրական պլանով 25 տոկոանոց աճ է նախատեսվում։
«2022 թվականի արտադրության բյուջեի պլանը, որը մշակվել է նոր բաժնետերերի կառավարման թիմի կողմից, նախատեսում է արտադրության 25% աճ՝ համեմատած 2021 թվականի փաստացի արդյունքների հետ»,– ասաց նա։
Այսինքն` եթե 2021թ-ին 17,6 մլն տոննա հանքաքար է վերամշակվել, 2022թ–ին նախատեսվում է 22 մլն տոննայի վերամշակում։
ԶՊՄԿ-ի ղեկավարությունը հայտարարում է, որ մոտ ապագայում ապատեղեկության սկզբնաղբյուր լրատվամիջոցի դեմ հայտ է ներկայացնելու դատարան` կոմբինատի սեփականատերերի և ղեկավարության հեղինակությունը վարկաբեկող կեղծ տեղեկություններ տարածելու համար։
Հիշեցնենք` Զանգեզուրի պղնձամոլիբդենային կոմբինատը Հայաստանում պղնձամոլիբդենային հանքաքարի առաջատար արդյունահանողն ու վերամշակողն է: Վերջին տարիներին կոմբինատը Հայաստանի խոշոր հարկատուների ցուցակում անփոփոխ կերպով պահպանում է իր դիրքը առաջին հնգյակում։