ԵՐԵՎԱՆ, 1 ապրիլի – Sputnik. ԱԺ–ի արտահերթ նիստում քիչ առաջ ընդունվեց «Քաղաքացիական պայմանագիր» խմբակցության պատգամավորների ներկայացրած Տեղական ինքնակառավարման մասին» օրենքում լրացում կատարելու մասին նախագիծը` երկրորդ ընթերցմամբ ու ամբողջությամբ։
Նախագծին կողմ քվեարկեց 57, դեմ` 3 պատգամավոր։
Ընդդիմադիր «Հայաստան» խմբակցութունը նիստին ու քվեարկությանը չմասնակցեց։
Նախագծի համահեղինակ, ՔՊ պատգամավոր Վահագն Հովակիմյանը հայտնեց, որ ընդդիմադիր խմբակցությունը առաջինից երկրորդ ընթերցում նախագծում մեկ փոփոխություն է առաջարկել, որն իրենք չեն ընդունել։
««Հայաստան» խմբակցութունն առաջարկում էր ըստ էության սահմանափակել, թե ով կարող է համայնքի ղեկավարի պաշտոնակատար լինել։ Այս դեպքում իրենք, կարելի է ասել, քաղաքական նպատակահարմարության հարց էին բերում»,– ասաց Հովակիմյանը։
Նշենք, որ օրենքում ընդունված փոփոխությունն ուժի մեջ է մտնում պաշտոնական հրապարակման օրվան հաջորդող տասներորդ օրը։ Այս տրամաբանությամբ` Նիկոլ Փաշինյանը նշված ժամկետը լրանալուց հետո իրավունք կստանա Վանաձոր համայնքի ղեկավարի պաշտոնակատար նշանակել։
Հիշեցնենք` ԱԺ–ն այսօր «Քաղաքացիական պայմանագիր» խմբակցության պատգամավորների նախաձեռնությամբ արտահերթ նիստ է գումարել։ Օրակարգում մեկ հարց է` «Տեղական ինքնակառավարման մասին» օրենքում լրացում կատարելու մասին` ՔՊ–ի հեղինակած նախագիծը։ Ընդ որում, նախագծի երկու ընթացումներն էլ նախատեսվում է իրականացնել մեկ նիստում` 24 ժամվա ընթացքում։
Նախագծի համահեղինակ ՔՊ անդամ Վահագն Հովակիմյանը նախագծի հրատապությունը մեկնաբանեց ՀՀ որոշ համայնքներում, մասնավորապես Վանաձորում ստեղծված վիճակով։
Բանն այն է, որ Վանաձորի համայնքապետարանի աշխատակազմը պարբերաբար մերժում է ավագանու անդամների` նիստ հրավիրելու նախաձեռնությունները` վկայակոչելով ՏԻՄ մասին օրենքը։
2021թ–ի դեկտեմբերի 5-ին Վանաձոր խոշորացված համայնքում կայացած ընտրություններում ավագանու մանդատ էին ստացել 5 խմբակցության 33 անդամ։ Բայց ավագանուն առ այսօր չի հաջողվում համայնքի ղեկավար ընտրել։ Վարչական դատարանն արգելանք է սահմանել, որով ավագանին դեռ իրավունք չունի համայնքապետի ընտրության օրակարգով նիստ գումարել։
Բանն այն է, որ դեռ անցած տարեվերջին Վանաձորի ավագանու ընտրություններին մասնակցած և ավագանի չանցած «Լուսավոր Հայաստան» կուսակցությունն էր բողոքարկել ընտրությունների արդյունքները։ Բողոքը 3 ամիս առաջ հասել է Վճռաբեկ դատարան, բայց դեռ վարույթ չի ընդունվել։
Իսկ ընտրություններում ամենաշատ թվով ձայներ ստացած «Մամիկոն Ասլանյան» դաշինքի առաջնորդ, նախկին քաղաքապետ Մամիկոն Ասլանյանը պաշտոնեական կեղծիքի և լիազորությունների չարաշահման մեղադրանքով արդեն 3 ամիս կալանքի տակ է։