ԵՐԵՎԱՆ, 31 մարտի – Sputnik. Հիդրոօդերևութաբանության և մոնիտորինգի կենտրոնի պետի տեղակալ Գագիկ Սուրենյանը «Ֆեյսբուք» սոցիալական ցանցում բնության եզակի երևույթի գեղեցիկ լուսանկար է հրապարակել։
Լուսանկարն արված է Սյունիքում՝ Մեղրիի լեռնաշղթայի վրա։
«Ձնածածկույթի ահռելի բարձրության հետևանքով ձյունը լեռնալանջերից սահել է և ընդունել այսպիսի բացառիկ տեսք»,– գրել է օդերևութաբանը։
Բնության գեղեցիկ լուսանկարը հիացրել է Սուրենյանի հետևորդներին։ Նրանք փաթաթված ձյունը համեմատել են բամբակե կծիկի, սպունգի ու ռուլետի հետ։
Օգտատերերից մեկն էլ հայտնել է, որ նույն երևույթը հանդիպել է Ջերմուկում։ «Ափսոս չնկարեցի»,– գրել է նա։