ԵՐԵՎԱՆ, 30 մարտի – Sputnik. ՎՏԲ-Հայաստան բանկը թվայնացման և գործընթացների օպտիմալացման շրջանակներում համաձայնագիր է կնքել «Արդշինբանկ» ՓԲԸ-ի հետ՝ իր վարկային պորտֆելի մոտ 11%-ի վաճառքի մասով։ Տեղեկությունը հրապարակվել է բանկի կայքում։
«Գործարքի ծավալը կազմում է 24 մլրդ ՀՀ դրամ»,– նշված է հաղորդագրության մեջ:
ՎՏԲ-Հայաստան բանկը հայտնում է նաև, որ շարունակում է մատուցել ֆինանսական ծառայությունների հիմնական տեսակները և կատարում է բոլոր պարտավորությունները հաճախորդների և գործընկերների նկատմամբ:
«Այժմ բանկի առաջնահերթ ռազմավարական խնդիրներն են բիզնես գործընթացների օպտիմալացումը և հեռահար սպասարկման համակարգերի կատարելագործումը: Այդ կապակցությամբ որոշում է կայացվել մանրածախ վարկային պորտֆելի մի մասը «Արդշինբանկ» ՓԲԸ-ին փոխանցելու վերաբերյալ: Այս նորարարության շրջանակներում բանկը նախատեսում է թողարկել բարձր տեխնոլոգիական գործիքներ, ներգրավել հաճախորդների նոր սեգմենտներ և ամրապնդել իր մրցակցային դիրքերը Հայաստանի բանկային շուկայում: Այժմ ՎՏԲ-Հայաստան բանկն աշխատանքներ է տանում «Мир» и UnionPay» վճարային քարտերի թողարկման ուղղությամբ»,- ասել է բանկի գլխավոր տնօրեն-տնօրինության նախագահ Իվան Տելեգինը:
ՎՏԲ-Հայաստան բանկի կողմից փոխանցված` ֆիզիկական անձանց վարկային պայմանագրերի մասով վճարումների ընդունումը և ամբողջական սպասարկումը 2022թ․ մարտի 28-ից կիրականացվի Արդշինբանկում։ Բանկի հաճախորդները, որոնց պայմանագրերը կտեղափոխվեն Արդշինբանկ, կտեղեկացվեն տեղափոխման գործընթացի վերաբերյալ SMS հաղորդագրության և էլեկտրոնային փոստի միջոցով: Պայմանագրով սահմանված պայմանները, ներառյալ տոկոսադրույքը, վարկի ժամկետը և վարկի այլ հիմնական պայմանները ՎՏԲ-Հայաստան բանկի հաճախորդների համար մնում են անփոփոխ և պահպանում են իրենց իրավական ուժը:
Հիշեցնենք, որ փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ սկսեցին տնտեսական պատժամիջոցներ կիրառել Ռուսաստանի դեմ։
Դրանք հիմնականում առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։