ԵՐԵՎԱՆ, 30 մարտի – Sputnik. Ոստիկանները վնասազերծել են Քաջարան քաղաքի Խանջյան փողոցի խանութներից մեկը մտած դիմակավորված ու զինված անձանց. կան ձերբակալվածներ։ Նման տեղեկություն է հայտնում ոստիկանությունը` հավելելով, որ դեպքը տեղի է ունեցել մարտի 29–ի լույս 30-ի գիշերը։
Հաղորդագրության համաձայն` ոստիկանություն ահազանգ է ստացվել, որ դիմակավորված ու զինված անձինք մտել են խանութ և բանկոմատից փորձում են գողություն անել։ Դեպքի վայր հասած ոստիկանները նկատել են, որ խանութի սրահից դիմակավորված անձ է դուրս եկել ու փախչում է, ևս երկուսը խանութում են։
Ոստիկանության Քաջարանի բաժանմունքի պետը, ներկայանալով, նրանցից պահանջել է հանձնվել։ Այդ ընթացքում դիմակավորված անձինք կրակել են, սակայն գնդակը ոստիկանին չի դիպել։ Բաժանմունքի պետը սկսել է բանակցել, և արդյունքում դիմակավորված անձինք դուրս են եկել խանութից, բերման ենթարկվել ու ձերբակալվել։
Նրանք Քաջարան քաղաքի 28 և 30 տարեկան բնակիչներ են։ Ոստիկանության ծառայողները հայտնաբերել ու բերման են ենթարկել խանութից փախած անձին, որը ևս ձերբակալվել է։ 29-ամյա երիտասարդը նույնպես Քաջարանի բնակիչ է։
Ոստիկաններն առգրավել են «Կալաշնիկով» ինքնաձիգն ու «Ջ-1» նռնակը։ Նշանակվել են փորձաքննություններ։