ԵՐԵՎԱՆ, 29 մարտի – Sputnik. Բուդապեշտում ընթացող ազատ ոճի ըմբշամարտի Եվրոպայի առաջնությունում Արման Անդրեասյանը 70 կգ քաշային կարգի եզրափակիչում 1։2 հաշվով պարտվեց վրացի Զուրաբի Յակոբիշվիլիին։
70 կգ քաշային Արման Անդրեասյանը երկու տպավորիչ և միևնույն ժամանակ դժվարին հաղթանակներից հետո նվաճեց կիսաեզրափակչի ուղեգիր։ Հայ ըմբիշը նախ 3։1 հաշվով առավելության հասավ թուրք Սալահատին Կիչսալայանի նկատմամբ, ապա 5։1 հաշվով հաղթեց գերմանացի Կևին Հենկելին։ Եզրափակիչ դուրս գալու համար Արմանը գոտեմարտեց մոլդովացի Նիկոլայ Գրահմեզի հետ։
Նա շատ վստահ էր զգում իրեն գորգի վրա ու առաջին մրցափուլում իր կամքն էր թելադրում մրցակցին։ Արդյունքում հայ ըմբիշն առաջ անցավ 4։0 հաշվով։ Երկրորդ մրցափուլում կողմերը միավորներ փոխանակեցին, ինչի շնորհիվ էլ Արման Անդրեասյանը հաղթեց 6։2 հաշվով։
Եվրոպայի չեմպիոնի որոշիչ գոտեմարտում հայ ըմբիշի մրցակիցը վրացի Զուրաբի Յակոբիշվիլին էր։ Շատ համառ պայքար ծավալվեց։ Առաջին մրցափուլից հետո հաշիվն հավասար էր՝ 1։1։ Ընդ որում` առավելությունը մրցակցի կողմն էր, քանի որ Յակոբիշվիլին վերջին էր վաստակել միավորը։ Արմանը ամեն ինչ արեց հաղթանակի հասնելու համար, բայց ստիպված էր համակերպվել 1։2 հաշվով պարտության հետ։ Այսպիսով, Արման Անդրեասյանը դարձավ Եվրոպայի առաջնության արծաթե մեդալակիր։