ԵՐԵՎԱՆ, 28 մարտի – Sputnik. Հայաստանյան փոքր արտահանողները ռուս գործընկերների հետ փորձում են նորացված պայմանների շուրջ համաձայնության գալ, որպեսզի մատակարարումները շարունակվեն։ ԱԺ տարածաշրջանային և եվրասիական ինտեգրման հարցերի հանձնաժողովի նիստի ժամանակ հայտնեց ֆինանսների նախարար Տիգրան Խաչատրյանը։
«Ռուս–ուկրաինական իրավիճակով պայմանավորված` ՀՀ տրանսֆերտները կկրճատվեն, իսկ ՌԴ արտահանվող ապրանքների մասով ծավալները կնվազեն։ Փոքր արտահանողները նախորդ տարի մոտ 850 միլիոն դոլարին համարժեք ապրանք են արտահանել ՌԴ, պայմանագրերի զգալի մասը նախատեսում էին տարաժամկետ վճարումներ, իսկ մի մասն էլ ռուբլով պետք է լինեին։ Ունենք ազդակներ, որ այդ կազմակերպություններն իրենց գործընկերների հետ փորձում են նորացված պայմանների շուրջ համաձայնության գալ»,–ասաց Խաչատրյանը։
Նրա խոսքով` այս ամենով պայմանավորված` կան մի քանի գործոններ, որոնք տնտեսական ակտիվությունը զսպող միջոց կարող են հանդիսանալ։ Հավանական է, որ սա նաև հարկային եկամուտների նվազեցման կբերի։ Սակայն նախարարը նշում է, որ այս տարի նախատեսված ծախսերը չեն կրճատելու` դրանք կլինեն այն ծավալով, ինչ նախատեսված է 2022-ի բյուջեով։