ԵՐԵՎԱՆ, 26 մարտի – Sputnik. ՌԴ ԶՈւ–ն շարունակում է հարձակումը Դոնբասում։ Այսօր այս մասին հայտարարել է ՌԴ ՊՆ պաշտոնական ներկայացուցիչ, գեներալ–մայոր Իգոր Կոնաշենկովը։
«ՌԴ ԶՈւ ստորաբաժանումները մարտական գործողություններ են վարում Նովոմիխայլովսկ բնակավայրը գրավելու համար։ Ցերեկային մարտերի ընթացքում ոչնչացվել է Ուկրաինայի ԶՈւ 54-րդ մեքենայացված բրիգադի ավելի քան 30 զինծառայող, 6 զրահամեքեա և 46-րդ առանձին գրոհային գումարտակի դաշտային հրետանու մարտկոց»,– ասել է նա։
Կոնաշենկովը հավելել է, որ ռուսական բանակը Նովոսյոլովկայում և Նովոբախմուտովկայում շարունակում է հարձակումը բետոնե կառույցներով ամրացված երկարաժամկետ հենակետերի վրա։
Տվյալ ուղղությամբ ոչնչացվել է 25-րդ առանձին օդադեսանտային բրիգադի մինչև 50 ուկրաինացի զինծառայող։ Ճնշվել են 7 երկարաժամկետ կրակակետեր և պաշտպանված թաքստոցներում գտնվող 5 զրահավոր օբյեկտ։
Ինչպես նշել է ՌԴ ՊՆ պաշտոնական ներկայացուցիչը` Ուկրաինայում հատուկ ռազմական գործողությունների ողջ ընթացքում ոչնչացվել է ավելի քան 270 ԱԹՍ և 1.600 միավոր զրահատեխնիկա։
«Մարտական հատուկ գործողությունների մեկնարկից ի վեր ընդհանուր առմամբ ոչնչացվել է 271 ԱԹՍ, ինչպես նաև 1627 տանկ և այլ մարտական զրահամեքենաներ», – ասել է Կոնաշենկովը։
Նա հավելել է, որ, բացի այդ, ոչնչացվել է 167 համազարկային կրակի ռեակտիվ համակարգ, 669 դաշտային հրետանու զենք և ականանետ, ինչպես նաև 1474 միավոր հատուկ ռազմական ավտոմոբիլային տեխնիկայից։
ՊՆ–ի տվյալներով` մեկ օրվա ընթացքում Ռուսաստանի մարտական ավիացիան խոցել է Ուկրաինայի 91 ռազմական օբյեկտ։
«Մեկ օրվա ընթացքում օպերատիվ–մարտավարական և բանակային ավիացիան խոցել է Ուկրաինայի 91 ռազմական օբյեկտ։ Այդ թվում 2 հրամանատարային կետ, սպառազինությամբ և ռազմամթերքով 11 դաշտային պահեստ, ռադիոէլեկտրոնային դիմադրության երկու կայան, ինչպես նաև Ուկրաինայի ԶՈւ ստորաբաժանումների 20 հենակետ և մարտական տեխնիկայի կենտրոնացման 52 շրջան», – ասել է ՌԴ ՊՆ պաշտոնական ներկայացուցիչը։
Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ուկրաինայում մարտական գործողություններն ընթանում են արդեն 31–րդ օրը։