Ոստիկանությանը բացահայտել է միջազգային կազմակերպված խմբի, որը հիմնականում առցանց եղանակով, հավաքագրել է այլազգի կանանց և առաջարկել տարբեր երկրներում, այդ թվում՝ Հայաստանում, զբաղվել մարմնավաճառությամբ։ Երեք անձ ձերբակալվել է, հայտնում է ՀՀ ոստիկանության մամուլի ծառայությունը։
Նշվում է, որ հարուցված քրգործի շրջանակներում ոստիկաններն իրականացրել են ավելի քան մեկ տասնյակ խուզարկություններ, որոնց արդյունքում հայտնաբերվել են մարմնավաճառությամբ զբաղվող կանայք և առանձնապես խոշոր չափերով գումարներ։ Պարզվել է, որ միջազգային կազմակերպված խումբը, կանանց խոստացել է ապահովել հաճախորդներով, բնակության վայրով և պոռնկությամբ զբաղվելու համար անհրաժեշտ այլ պայմաններով՝ փոխարենը պահանջելով մարմնավաճառությամբ «վաստակած» գումարի կեսը փոխանցել իրենց։
«Կազմակերպված խմբի կազմում առցանց եղանակով ընդգրկվել են նաև Երևանի կենտրոնում, հիմնականում նորակառույց շենքերում, վարձակալությամբ բնակարաններ տրամադրող անձինք, որոնք ստանձնել են պոռնկությամբ զբաղվելու համար բնակարանով ապահովելու պարտականությունը»,–նշված է հաղորդագրության մեջ:
Նախաքննությունը շարունակվում է։