ԵՐԵՎԱՆ, 24 մարտի – Sputnik. Ռուսաստանն առաջարկել է ԵԱՏՄ բոլոր երկրներին փակել արտաքին կոնտուրները, այսինքն՝ փակել արտահանումն իրենց երկրներից, որպեսզի մատակարարեն հացահատիկի ամբողջ անհրաժեշտ ծավալը։
Այս մասին լրագրողների հետ ճեպազրույցում ասաց ՀՀ էկոնոմիկայի նախարար Վահան Քերոբյանը` անդրադառնալով Ռուսաստանից հացահատիկի արտահանմանը վերաբերող սահմանափակումներին:
«Եթե բոլոր երկրները համաձայնեն, ապա մենք ԵԱՏՄ-ի մակարդակով արտաքին սահմանները կփակենք, ներքին առևտուրն ամբողջությամբ կբացենք: Ռուսաստանը ռիսկեր է տեսնում, որ կարող է այլ երկրներ մեր մոտից ցորեն տանեն, ցանկանում են, որպեսզի մեր սահմանները փակենք ու իրենք անկաշկանդ ապահովեն անհրաժեշտ ծավալները։ Եթե, օրինակ, որոշ երկրներ, որոնք ցորենի արտահանող են, հրաժարվեն դա անել, ապա մենք հարցը կլուծենք երկկողմ ճանապարհով: Հարցի լուծումն ընթացքի մեջ է: Կարծում եմ՝ մի քանի օրվա ընթացքում այդ հարցը կլուծվի»,- ասաց Քերոբյանը:
Հիշեցնենք, որ Ռուսաստանը ժամանակավոր արգելք է սահմանել ԵԱՏՄ երկրներ հացահատիկ արտահանելու վրա։
Սահմանափակումը գործելու է ցորենի, մեսլինի, աշորայի, գարու և եգիպտացորենի վրա` մինչև 2022 թվականի օգոստոսի 31-ը։
Մարտի 23-ին ՀՀ փոխվարչապետը հայտնել է, որ ԵԱՏՄ անդամ երկրների միջև ձեռք է բերվել հստակ պայմանավորվածություն` մինչև մարտի 25-ը իրականացնել փոխադարձ բալանսների հաշվարկ` ԵԱՏՄ երկրների պարենային անվտանգությունն ապահովելու համար։