ԵՐԵՎԱՆ, 23 մարտի – Sputnik. Հայաստանում «Կինդեր սյուրպրիզ» շոկոլադի դեֆիցիտ չկա։ Տեղեկությունը Sputnik Արմենիայի հետ զրույցում հայտնեց «Դերժավա» ընկերությունների խմբի մարքեթինգի բաժնի ղեկավար Լուսինե Սաթամյանը։ Նա նշեց, որ «Դերժավա» ընկերությունների խումբը, որը 50–ից ավելի բրենդներ է ներկրում Հայաստան, դրանցից ոչ մեկի հետ կապված ներմուծման խնդիր չունի։
Երեկ տեղեկություններ տարածվեցին, որ մի քանի խոշոր սուպարմարկետներում «Կինդեր Սյուրպրիզ» շոկոլադ չկա, և դա կապված է Լարսի անցակետի փակ լինելու հետ։
«Մեր կողմից ներմուծվող ապրանքների հետ կապված խնդիր չունենք։ Եթե մեկ–երկու պրոդուկտ որևէ խանութում պակասում է, ապա դա կարող է կապված լինել Լարսի փակ լինելու հետ, ինչին որ մյուս ներմուծողները ևս բախվում են ձմռան ամիսներին։ Բայց այժմ մեր պահեստներում ոչ մի խնդիր, առավել ևս որևէ ապրանքի դեֆիցիտ չկա»,–ասաց Սաթամյանը։
Նրա խոսքով`ներմուծման գործընթացը բնականոն շարունակվում է, պատվերները գրանցվում են, և ապրանքները ներմուծվում են։
Հիշեցնենք, որ երեկ Sputnik Արմենիայի հետ զրույցում Ռուսաստանում Հայաստանի դեսպանատանը կից մաքսային կցորդ Արամ Թանանյանը հայտնել էր, որ շուրջ 4 հազար տրանսպորտային միջոց, որոնց թվում են նաև հայկականները, մնացել են ռուսական կողմից դեպի «Վերին Լարս» անցակետ տանող ճանապարհին:
Նշենք, որ մարտի 18-ից, ձյան և մերկասառույցի պատճառով, Մցխեթա–Ստեփանծմինդա–Լարս ավտոճանապարհի Գուդաուրի–Կոբի հատվածը փակ է բոլոր տեսակի տրանսպորտային միջոցների համար։