Ռուսաստանի օդատիեզերական ուժերը հարվածներ են հասցրել ուկրաինացի ազգայնականների հենակետերին և ոչնչացրել դրանցից մեկն ու քողարկված զրահատեխնիկան։ Տեղեկությունը հայտնում է ՌԻԱ Նովոստին` հղում անելով ՌԴ պաշտպանության նախարարությանը։
ՊՆ–ն հրապարակել է հենակետի ոչնչացման կադրերը: Տեսանյութում ցուցադրվում է Կա-52 ուղղաթիռների թռիչքն ու մարտական աշխատանքը։
«Ռուսաստանի օդատիեզերական ուժերի բանակային ավիացիայի անձնակազմերը հրթիռային սպառազինությամբ հարվածներ են հասցրել ուկրաինացի ազգայնականների հենակետերին։ Ավիահարվածները հասցվել են փոքր և չափազանց փոքր բարձրություններից։ Ավիացիոն հարվածի արդյունքում ոչնչացվել է ուկրաինացի ազգայնականների վաշտի հենակետը և քողարկված զրահատեխնիկան», - նշել են գերատեսչությունում։
Ռազմական հատուկ գործողության շրջանակում բանակային ավիացիան շարասյուների ուղեկցման, զրահատեխնիկայի ոչնչացման, դեսանտայինների ու ռազմական բեռների տեղափոխման, հատուկ գործողության շրջանակում առաջադրանքներ կատարող ստորաբաժանումների ավիացիոն աջակցության խնդիրներ է իրականացնում։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 24–րդ օրը։