Լվովում արևմտյան դիվանագետների դեմ ահաբեկչություն է նախապատրաստվել. ՌԴ ՊՆ

ԵՐԵՎԱՆ, 19 մարտի – Sputnik. «Ազովի» գումարտակի ազգայնականները ահաբեկչական գործողություններ են ծրագրել Լվովում ԱՄՆ-ի և արևմտյան այլ երկրների դիվանագետների դեմ` դա իբրև ռուս զինվորականների կողմից թիրախավորված հարձակում ներկայացնելու համար։ Այսօր ճեպազրույցի ժամանակ հայտարարել է ՌԴ պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը։

Նրա խոսքով` այս սադրանքը ծրագրվել է ՌԴ–ի նկատմամբ Արևմուտքի ճնշումը մեծացնելու համար, որպեսզի ՆԱՏՕ-ի անդամ երկրները լրացուցիչ սպառազինություն տրամադրեն Ուկրաինայի օդային տարածքը փակելու համար։

Կոնաշենկովը նշել է, որ այս տեղեկությունները ռուսական կողմին է հաղորդել հատուկ ռազմական գործողության ընթացքում Դոնեցկի և Լուգանսկի շրջաններում Ուկրաինայի անվտանգության ծառայության գլխավոր վարչության աշխատակիցը, որը կամավոր հանձնվել է ռուս զինվորականներին։

Ռուսական կողմին հանձնված ուկրաինացի զինվորականը տեղեկություններ է փոխանցել Դոնբասի տարածքում դիվերսիոն գործողությունների իրականացմանը մասնակցող բոլոր անձանց վերաբերյալ։

ՌԴ ՊՆ ներկայացուցիչը նաև հայտնել է, որ ռուսական զինուժը ճեղքել է ուկրաինական «Այդար» գումարտակի պաշտպանությունը և շուրջ 30 զինյալների ոչնչացրել։

Ամփոփելով վերջին օրվա ռազմական գործողությունների տվյալները` ՊՆ ներկայացուցիչը հայտնել է, որ ռուսական ավիացիան մեկ օրում ոչնչացրել է ուկրաինական 59 ռազմական օբյեկտ, Ս-300 համալիրի տեղորոշիչ և հինգ անօդաչու թռչող սարք, այդ թվում՝ մեկ «Բայրաքթար»։

Ուկրաինայում ռազմական հատուկ գործողության մեկնարկից ի վեր Ռուսաստանի Դաշնության զինված ուժերը ոչնչացրել են ավելի քան 200 անօդաչու թռչող սարք, 1440 տանկ և այլ զրահատեխնիկա։

Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։

Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։

Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։

Ուկրաինայում մարտական գործողություններն ընթանում են արդեն 24–րդ օրը։