Խորհրդային մանկական երգից մինչև ավանդական «Բերդ». Երևանում աջակցություն հայտնեցին ՌԴ–ին

Ի պաշտպանություն Ռուսաստանի այսօր Երևանում անցկացված ցույցի մասնակիցները ՌԴ և ՀՀ դրոշներով, պաստառներով ու ռազմական գործողության խորհրդանիշ «Z» և «V» տարբերանշաններով հավաքվել էին Ստեփան Շահումյանի անվան հրապարակում։

Հանրահավաքը սկսվեց խորհրդային հայտնի մանկական երգով` «Հզոր Հայաստան Ռուսաստանի հետ. Հանուն նոր միության» շարժման կանանց խորհրդի նախագահ Ալլա Հակոբյանի կատարմամբ։ Նա հիշեց, թե ինչպես էր ոչ վաղ անցյալում խորհրդային սերունդը հավաքվում հարակից այգում, որտեղ երգեր էին հնչում։

Քաղաքական ու հասարակական կազմակերպությունների ներկայացուցիչների ելույթներից հետո ակցիայի մասնակիցները երթով անցան Երևանի կենտրոնական փողոցներով ու հասան ՀՀ–ում ՌԴ դեսպանատուն։

Դեսպանատան մոտ մի խումբ հայ երիտասարդներ պարեցին հայկական ավանդական «Բերդ» պարը։

Ակցիայի ավարտին Տիգրան Ուրիխանյանը հայտարարեց, որ Ռուսաստանին աջակցելու ակցիաների շարքը շարունակական է լինելու։ Հաջորդ հավաքը տեղի կունենա հաջորդ շաբաթ օրը` մարտի 26-ին։ «Սա պետք է դառնա ալիք` ուղղորդելու ՀՀ դիվանագիտությանը` վարելու ճիշտ հայամետ քաղաքականություն»,– ասաց նա` հավելելով, որ Հայաստանն այսօր իրավունք չունի սխալվելու այն սպառնալիքի առաջ, որն արդեն զգացվում է Հայաստանի գլխավերևում։

Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։

Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։

Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։

Ուկրաինայում մարտական գործողություններն ընթանում են արդեն 24–րդ օրը։