ԵՐԵՎԱՆ, 18 մարտի – Sputnik. Հայտնի երգիծաբան և դերասան Միխայիլ Գալուստյանը նկարահանվել է ռուսական նոր մանկական ֆիլմում, որի դերասանական կազմը հիմնականում երեխաներ են։ Գալուստյանը «Արտեկ» ֆիլմի թրեյլերը հրապարակել է Instagram-ի իր էջում։
«Շատ շուտով նոր մանկական ֆիլմ` երեխաների համար, երեխաների մասնակցությամբ ։ Ֆիլմում հանդես եմ գալիս թե որպես դերասան, թե որպես պրոդյուսեր»,–գրել է Գալուստյանը։
Նա հետևորդներից հարցրել է, թե արդյոք հավանում են ֆիլմի թրեյլերը և նրանցից ովքեր են եղել մանկական ճամբարում։
Ըստ ֆիլմի թրեյլերի, «Արտեկ» մանկական ճամբարում կա մի ծառ, որը, ըստ լեգենդի, կարող է կատարել բոլոր նվիրական երազանքները։ Մի խումբ երեխաներ հայտնվում են այդ ճամբարում և ծառի օգնությամբ տեղափոխվում են 1988 թվական։ Գալուստյանը այդ ճամբարի շատ խիստ ջոկատավարն է։ Այստեղ երեխաները հանդիպում են իրենց ծնողներին, որոնք, ըստ սցենարի, դեռ 10 տարեկան են։ Երեխաները շատ կարճ ժամանակ ունեն ապագա վերադառնալու համար, հակառակ պարագայում կմնան անցյալում։
Ֆիլմը շուտով հասանելի կլինի ռուսաստանյան կինոթատրոններում։
Գալուստյանի հետևորդները գրել են, որ շատ են հավանել ֆիլմի թրեյլերը և մեծ հաճույքով իրենց երեխաների հետ կգնան ֆիլմը դիտելու։