ԵՐԵՎԱՆ, 15 մարտի – Sputnik. ՀՀ արտաքին գործերի նախարարությունը վստահ է` Ադրեբջանի կողմից ներկայացված խաղաղության պայմանագրի 5 սկզբունքն ամբողջությամբ չի արտացոլում առկա խնդիրների ողջ օրակարգը։
Այս մասին ասել է ՀՀ ԱԳ նախարար Արարատ Միրզոյանը «Արմենպրեսին» տված հարցազրույցում, որտեղ ներկայացրել է այդ սկզբունքների վերաբերյալ հայկական կողմի դիրքորոշումը։
Նշենք, որ մարտի 14-ին Ադրբեջանի արտաքին գործերի նախարարությունը հանրայնացրել է Հայաստանի հետ հարաբերությունների կարգավորման 5 հիմնական սկզբունքները։
Միրզոյանը կարևորել է այն հանգամանքը, որ խաղաղության պայմանագրի շուրջ յուրաքանչյուր բանակցություն պիտի ընթանա առանց նախապայմանների։ Քանի որ նշված կետերից մեկն ինքնիշխանության, տարածքային ամբողջականության, միջազգային սահմանների անխախտելիության և միմյանց քաղաքական անկախության փոխադարձ ճանաչմանն է վերաբերում, ՀՀ ԱԳ նախարարը հիշեցրել է` դեռևս 1991 թվականի դեկտեմբերի 8-ին 2 երկիրն էլ համատեղ ստորագրելով «Անկախ պետությունների համագործակցության ստեղծման մասին» համաձայնագիրը, արդեն իսկ ճանաչել են միմյանց տարածքային ամբողջականությունը և ընդունել են, որ չունեն միմյանց նկատմամբ տարածքային պահանջներ։
«Հարկ է նկատել նաև, որ առաջարկում նշված կետերն ամբողջությամբ չեն արտացոլում առկա խնդիրների ողջ օրակարգը։ Հայկական կողմի համար սկզբունքային և հիմնարար է, որ հստակ երաշխավորվեն արցախահայության իրավունքները և ազատությունները, վերջնականապես հստակեցվի Լեռնային Ղարաբաղի կարգավիճակը։ Մեզ համար ԼՂ հիմնախնդիրը տարածքային հարց չէ, այլ իրավունքների»,– ասել է Միրզոյանը:
Խոսելով նաև Ադրբեջանի կողմից հնչեցված առաջարկներում առկա սահմանազատման և սահմանագծման գործընթացի , ինչպես նաև տարածաշրջանում տրանսպորտային ենթակառուցվածքների ապաշրջափակման մասին, նա հայտնել է, որ Հայաստանը շարունակում է հետևողական լինել, որպեսզի 2020 թվականի նոյեմբերի 9-ի, 2021 թվականի հունվարի 11-ի և 2021 թվականի նոյեմբերի 26-ի եռակողմ հայտարարություններով ամրագրված պայմանավորվածությունները լիարժեք կյանքի կոչվեն։ Նախարարը նաև շեշտել է, որ հայկական կողմը նույնիսկ հանդես է եկել այդ պայմանավորվածությունները կյանքի կոչելու համալիր առաջարկներով, ինչպես, օրինակ, զորքերի հայելային հետքաշմամբ և միջազգային մոնիթորինգի մեխանիզմի ներդրմամբ սահմանազատման գործընթացի մեկնարկի, որոնք սակայն ադրբեջանական կողմը մերժել է։
Նախարարը նաև հիշեցրել է, որ ՀՀ ԱԳՆ-ն դիմել է ԵԱՀԿ Մինսկի խմբի համանախագահությանը՝ կազմակերպելու խաղաղության պայմանագրի շուրջ բանակցությունները: