ԵՐԵՎԱՆ, 15 մարտի – Sputnik. Ռուս–ուկրաինական կոնֆլիկտի ընթացքում` մարտի 2-ից մինչ օրս, Հայաստանի բանկերում շուրջ 6500 օտարերկրյա քաղաքացի է գրանցվել։ Այսօր լրագրողների հետ հանդիպմանը հայտարարեց ՀՀ ԿԲ նախագահ Մարտին Գալստյանը։
Միաժամանակ, ԿԲ նախագահը չհերքեց, որ ՌԴ քաղաքացիներին ՀՀ բանկերը բավական խիստ ընթացակարգով են գրանցում։
«Բանկերը պատշաճ ուսումնասիրում են իրենց նոր հաճախորդներին, որպես կանոն փորձում են հասկանալ, թե հաճախորդները «տրանզիտ» հաճախորդնե՞ր են, թե՞ նրանց տնտեսական շահի կենտրոնն այս պահին հանդիսանում է ՀՀ–ն։ Եթե երկրորդ տարբերակն է, այսինքն` հաճախորդները ներգրավվում են ՀՀ բանկային համակարգ, որովհետև իրենց տնտեսական շահի կենտրոնի փոփոխություն է տեղի ունեցել, ապա որևէ խնդիր չի առաջանում»,– ասաց Գալստյանը։
Հակառակ դեպքում, եթե բանկում հասկանում են, որ հաճախորդը ՀՀ բանկային համակարգն օգտագործում է բացառապես իր գումարները արտերկիր տարանցելու նպատակով, այդ դեպքում ՀՀ ԿԲ նախագահը չի բացառում, որ բանկը կարող է նաև մերժել նման հաճախորդների գրանցումը` իր հայեցողությամբ։
ՀՀ ոստիկանության Անձնագրային և վիզաների վարչության պետ Արա Մկրտչյանը մարտի 14-ին Sputnik Արմենիայի հետ զրույցում հայտնել էր, որ փետրվարի 24-ի հատուկ ռազմական գործողության մեկնարկից ի վեր ՀՀ իշխանությունները Ռուսաստանի և Ուկրաինայի քաղաքացիներից ընդհանուր առմամբ 355 դիմում են ստացել Հայաստանի քաղաքացիություն ստանալու հարցով։
Դիմածներից 349–ը ՌԴ քաղաքացիներ են, 6–ը` Ուկրաինայի։