ԵՐԵՎԱՆ, 15 մարտի – Sputnik. Գերմանական Bayer կոնցեռնը կշարունակի դեղամիջոցներ մատակարարել Ռուսաստան, ինչպես նաև կպահպանի ՌԴ-ում դրանց արտադրության գործող ճյուղը: Այս մասին հայտնում է ՌԻԱ Նովոստին ՝ վկայակոչելով ընկերության մամուլի ծառայությանը։
«Bayer-ը կշարունակի դեղամիջոցներ մատակարարել և տեղեկացնել իր արտադրանքի ճիշտ օգտագործման մասին։ Մեր էթիկական սկզբունքները մնում են անփոփոխ. մենք պետք է մեր դեղամիջոցները մատակարարենք ռուս հիվանդներին։ Ընկերությունն առավելագույն ջանքեր է գործադրում դեղամիջոցների մատակարարման չընդհատման համար և պահպանում է գործընկերությունը Ռուսաստանի հետ արտադրության հարցում», – հայտարարել է Ռուսաստանում և ԱՊՀ երկրներում Bayer-ի գլխավոր ներկայացուցիչ Նիլս Հեսմանը:
Ավելի վաղ` մարտի 14–ին, Bayer AG-ն հայտարարել էր, որ կդադարեցնի գովազդային գործունեությունը և ներդրումային նախագծերը Ռուսաստանում ու Բելառուսում, սակայն կշարունակի մատակարարել հիմնական ապրանքները գյուղատնտեսության և առողջապահության համար:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 20–րդ օրը։