Ակնհայտ վայրենություն է. մեդիափորձագետը` սոցցանցերում բռնության կոչ թույլ տալու մասին

Այն, որ Facebook-ը թույլ է տալիս կամ դեմ չէ, որ բռնության կոչեր հնչեցվեն Ռուսաստանի զինծառայողների և քաղաքացիների հասցեին, ակնհայտ վայրենություն է։ Մեկ այլ հարց է այն, որ դա հակասում է մի շարք երկրների, այդ թվում Հայաստանի օրենսդրությանը։ Sputnik Արմենիայի եթերում, նման կարծիք հայտնեց մեդիափորձագետ Արթուր Պապյանը՝ մեկնաբանելովFacebook, Instagram և այլ սոցցանցերի սեփականատեր Meta ընկերության որոշումը ռուս զինվորների մասին բռնության կոչ հնչեցնելու թույլտվության մասին։
Պապյանի խոսքով՝ այն ոչ միայն տարբեր երկրների օրենսդրությանն, այլև Facebook-ի «Համայնքի օգտագործման կանոններին» է հակասում, որտեղ ասվում է, որ չի կարելի հնչեցնել բռնության կոչեր, մարդկանց ծաղրել կամ ֆաշիստական հայտարարություններ անել։

Ցանկացած դեպքում Պապյանը կարծում է, որ այս որոշումը դժվար թե Facebook-ի համար վատ անդրադարձ ունենա, որովհետև, օրինակ, Ռուսաստանի դեպքում այսպես, թե այնպես օգտատերերը քիչ են մուտք գործում այդ սոցցանցեր, քանի որ Ռուսաստանի իշխանություններն արգելափակում են դրանք։

Մեդիափորձագետը նաև կարծում է, որ մտահոգիչ է, երբ պատժամիջոցները բոլորի վրա են տարածվում ու ինտերնետ ծառայություն մատուցողները սահմանափակում են Ռուսաստանի շուկան, քանի որ այդպես նրանք ավելի են հեշտացնում ցենզուրան, խաթարում են նաև քաղաքացիների հնարավորությունը ինքնակազմակերպվելու կամ օբյեկտիվ ինֆորմացիա ունենալու։

Պապյանը նաև նշեց, որ այն հանգամանքը, որ Հայաստանն ընդգրկվել է այն սահմանափակ քանակի երկրների ցանկում, որտեղ բռնության կոչը ռուսների նկատմամբ թույլատրվում է, պայմանավորված է զուտ Ռուսաստանի գործոնով ու այդ երկրի հետ ունեցած հարաբերություններով։

Ինչպես արդեն հայտնել էինք, ամերիկյան Meta բազմազգ հոլդինգը մեղմացնում է ատելության խոսքի կանոնները (hate speech) և ժամանակավորապես որոշ երկրներում Facebook-ի և Instagram-ի օգտատերերին չի արգելի ռուս զինվորականների նկատմամբ բռնություն կոչեր անել։ Միաժամանակ ընկերությունը պահպանում է Ռուսաստանի խաղաղ բնակչության դեմ ուղղված ատելության խոսքի արգելքը։
Իր հերթին Ռուսաստանի գլխավոր դատախազությունը դիմել է դատարան՝ խնդրելով Meta-ն (Facebook-ի, Instagram-ի, WhatsApp-ի) ճանաչել ծայրահեղական կազմակերպություն։