ԵՐԵՎԱՆ, 10 մարտի – Sputnik. Ուկրաինայում հաճախակի են դարձել ռուս բուժաշխատողների և հատուկ բժշկական ավտոմեքենաների վրա հարձակումները։ Այս մասին այսօր ճեպազրույցի ժամանակ հայտարարել է ՌԴ ՊՆ պաշտոնական ներկայացուցիչ Իգոր Կոնաշենկովը։
«Վերջին օրերին ռուս բժիշկների և բժշկական հատուկ ավտոմեքենաների վրա ավելի հաճախակի են դարձել հարձակումները ուկրաինացի ազգայնականների և ԱՄՆ–ից, Մեծ Բրիտանիայից և Եվրոպայից Ուկրաինա ժամանած վարձկանների կողմից», – ասել է Կոնաշենկովը։
Նրա խոսքով` դարանատեղից տարբերանշանով (Կարմիր խաչի) բժշկական տրանսպորտային միջոցների վրա հարձակումները կանխամտածված են արվում։
ՌԴ ՊՆ պաշտոնական ներկայացուցիչը նշել է, որ դիպուկահարները մեծ հեռավորություններից կրակ են բացում մարտական գործողությունների վայրից վիրավոր ռուս զինծառայողներին տարհանող, ինչպես նաև տեղի բնակիչներին օգնություն ցուցաբերող բժիշկների վրա։
«Կրկին նախազգուշացնում ենք. լավագույնը, ինչ սպասում է մարտական գործողությունների վայրում ձերբակալված օտարերկրյա վարձկաններին, քրեական պատասխանատվության ենթարկվելն է», – հավելել է Կոնաշենկովը։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Մարտական գործողություններն ընթանում են արդեն 15–րդ օրը։