ԵՐԵՎԱՆ, 9 մարտի – Sputnik. ԵՄ–ն որոշել է բելառուսական երեք բանկերի անջատել SWIFT-ից։ Տեղեկությունը հայտնում է եվրոպական հանձնաժողովը։
«Մասնավորապես, SWIFT-ից կանջատվեն Բելագրոպրոմբանկը, Դաբրաբիտը և Բելառուսի Հանրապետության զարգացման բանկը, ինչպես նաև նրանց դուստր ընկերությունները»,–ասվում է հաղորդագրության մեջ։
Ավելի վաղ ԵՄ–ն Բելառուսին «համաագրեսոր» էր անվանել Ուկրաինայում տիրող իրավիճակի առնչությամբ։
Իր հերթին պաշտոնական Մինսկը քանիցս հայտարարել է, որ ՌԴ ռազմական օպերացիայում ոչ մի բելառուս զինվոր և ոչ մի բելառուսական տեխնիկա չի մասնակցում։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Մարտական գործողություններն ընթանում են արդեն 14–րդ օրը։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։