ԵՐԵՎԱՆ, 7 մարտի – Sputnik. Արցախի Ասկերանի շրջանի Խրամորթ գյուղի գյուղապետ Զորիկ Աբրահամյանը Sputnik Արմենիայի հետ զրույցում հայտնեց, որ այս պահին գյուղում իրավիճակը հանգիստ է, խուճապ չկա։
Այսօր կեսօրին ադրբեջանական զինուժը հրետակոծել էր գյուղի գերեզմանատունը հրետանային զինատեսակներից և ականանետերից։ Հրադադարի ռեժիմի խախտման մասին տեղեկությունը փոխանցվել էր ռուսական խաղաղապահ զորախմբի հրամանատարությանը։
«Այս պահին իրավիճակը կայունացել է, գյուղում խուճապային տրամադրություններ չկան, Խրամորթն ապրում է իր կյանքով»,- ասաց Աբրահամյանը։ Միաժամանակ նա հերքեց սոցիալական ցանցերում բնակչության տարհանման մասին լուրերը՝ դրանք անվանելով ծիծաղելի։
Գյուղի բնակիչներից մեկը ևս հաստատեց, որ իրավիճակը կայուն է։
«Մեզ չեն տեղահանում, բոլորս գյուղում ենք»,– Sputnik Արմենիային ասաց Խրամորթի բնակիչ Գոհար Գրիգորյանը։
Ավելի վաղ հայտնել էինք, որ ադրբեջանական զինուժը հերթական անգամ խախտել է հրադադարի պահպանման ռեժիմը Ասկերանի շրջանի Խրամորթ գյուղի գերեզմանատան ուղղությամբ:
Խրամորթ գյուղի ուղղությամբ ադրբեջանական կողմը կիրառել է ականանետ։