ԵՐԵՎԱՆ, 4 մարտի – Sputnik. ՆԱՏՕ-ն և Գերմանիան չեն միջամտի Ուկրաինայում տեղի ունեցող ռազմական գործողություններին, Բեռլինում կայացած ճեպազրույցի ժամանակ հայտարարել է Գերմանիայի Դաշնային Հանրապետության (ԳԴՀ) նախարարների կաբինետի ներկայացուցիչ Վոլֆգանգ Բյուխները։
«Այս ամենն արդեն իսկ ասել է Գերմանիայի կանցլերը` երեկ երեկոյան տված հարցազրույցում, միանգամայն պարզ է, որ ՆԱՏՕ-ն և Գերմանիան չեն միջամտի այս պատերազմին», - ասել է Բյուխները՝ պատասխանելով լրատվամիջոցների հարցերին։
Ավելի վաղ Գերմանիայի կանցլեր Օլաֆ Շոլցը հայտարարել էր, որ Գերմանիան, ՆԱՏՕ-ն և այլ երկրներ չեն նախատեսում ռազմական միջամտություն Ուկրաինայի իրադարձություններին։ Նա շեշտել էր, որ Գերմանիան Ուկրաինայի հակամարտության կողմ չէ և չի էլ դառնա։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Փետրվարի 21–ից սկսած, երբ Վլադիմիր Պուտինը հայտարարեց ԼԺՀ–ն ու ԴԺՀ–ն ճանաչելու որոշման մասին, ԱՄՆ–ն, Եվրամիությունն ու Արևմուտքի շատ երկրներ պատժամիջոցների շարք սկսեցին Ռուսաստանի դեմ։
Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։