Ռազմական վերլուծաբան Դավիթ Ջամալյանը Sputnik Արմենիայի եթերում անդրադարձել է «Զինվորական ծառայության և զինծառայողի կարգավիճակի մասին» օրենքում փոփոխություններ և լրացում կատարելու մասին օրենքի նախագծին, որով առաջարկվում է պարտադիր զինվորական ծառայությունից ազատել պատերազմի ժամանակ զոհված զինծառայողների եղբայրներին ու որդիներին:
Տվյալ նախաձեռնությունը լավն է, բայց այն անկասկած պետք է կյանքի կոչի պետականակենտրոն իշխանությունը։ Սոցիալական արդարության դիրքերից ճիշտ մտահղացում է, բայց եթե պետականակենտրոն իշխանությունն է այն առաջ քաշում, ապա միանգամից ներկայացնում է նաև այն առաջարկները, որոնք պետք է լրացնեն զինված ուժերի համալրման բացը, որը կառաջանա այս նախաձեռնությունը կյանքի կոչելիս, Sputnik Արմենիայի հետ զրույցում ասաց ռազմական վերլուծաբան Դավիթ Ջամալյանը։
«Նման առաջարկների դեմքում միաժամանակ պետք է մտածել բանակի մարտունակությունը պատշաճ մակարդակի պահելու, համալրման խնդիրներն արդյունավետորեն լուծելու մասին։ Հիմա մենք տեսնում ենք ընդամենը ականջահաճո, պոպուլիստական հերթական մի նախաձեռնություն, առաջ են բերում գեղեցիկ հնչող օրինագիծ, որն այս ձևով ընդունվելու պարագայում հարվածելու է զինված ուժերի մարտունակությանը»,– ասաց ռազմական վերլուծաբանը։
Ջամալյանի դիտարկմամբ` 44-օրյա պատերազմում հարազատներին կորցրած ընտանիքները հայրենիքին տվել են առավելագույնը, և սոցիալական արդարության սկզբունքից ելնելով` պետք է արտոնյալ լինեն մեր հասարակության մեջ, բայց նրանց արժանիորեն գնահատող նախագծերին զուգահեռ պետք է առաջ մղել նաև այնպիսի նախաձեռնություններ, որոնք կլուծեն բանակի ներդաշնակ համալրման խնդիրը։
Ռազմական վերլուծաբանի կարծիքով` զինված ուժերի համալրման բացը հնարավոր է լրացնել միայն պայմանագրային զինծառայության հատվածին ավելի մեծ ուշադրություն դարձնելով, ուստի սոցիալ–իրավական երաշխիքների առումով պետք է շատ բան անել, որպեսզի պայմանագրային զինծառայությունը դառնա ավելի հրապուրիչ։
Նշենք, որ ԱԺ «Քաղաքացիական պամանագիր» խմբակցության պատգամավոր Հայկ Սարգսյանը հանդես է եկել օրենսդրական նախաձեռնությամբ`առաջարկելով փոփոխություններ կատարել «Զինվորական ծառայության և զինծառայողի կարգավիճակի մասին» օրենքում, ըստ որի` պարտադիր զինվորական ծառայությունից կարող են ազատվել պատերազմի ժամանակ զոհված զինծառայողների եղբայրներն ու որդիները: