ԵՐԵՎԱՆ, 1 մարտի — Sputnik. Անցած գիշեր գնդակոծության հետևանքով 3 ադրբեջանցիներ են մահացել, նրանք հարազատներ են։ Տեղեկությունը հայտնում է Sputnik Ադրբեջանը։ Եվս մեկ զինծառայող էլ մահացել է Խարկովում, նրան սպանել են անհայտ անձինք, 4 հոգի վիրավորվել են և տեղափոխվել հիվանդանոց:
Այսօր ուկրաինացի զինծառայողները սպանել են Էլդար Մահմուդովին իր իսկ ավտոմեքենայում Կրիվոյ Ռոգ մուտք գործելու ժամանակ սահմանակետը հատելիս: Նա տեղում մահացել է:
Ռուսլան Մանաֆովին բռնել են Կիև-Ժիտոմիր ճանապարհին և տարել անհայտ ուղղությամբ։ Ադրբեջանի ևս մեկ քաղաքացի Կիևում տնից դուրս է եկել և չի վերադարձել:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ավելի ուշ ՌԴ ՊՆ-ն ընդգծեց, որ Ռուսաստանի զինված ուժերը ոչ մի հրթիռային, ավիացիոն կամ հրետանային հարված չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան: