Ուկրաինայի Գերագույն ռադան հայտարարել է, որ Կիևի հեռուստաաշտարակի վրա արկ ընկնելուց հետո հեռարձակման հետ կապված խնդիրներ կան։
Ուկրաինական լրատվամիջոցները պնդում են, որ հեռուստաաշտարակի շրջանում 2 պայթյուն է եղել։
Ավելի վաղ Ռուսաստանի պաշտպանության նախարարության պաշտոնական ներկայացուցիչ Իգոր Կոնաշենկովը հայտարարել էր, որ Ռուսաստանը հարվածներ կհասցնի Ուկրաինայի ԶՈւ տեղեկատվական-հոգեբանական գործողությունների կենտրոնին, ինչպես նաև Ուկրաինայի անվտանգության ծառայության տեխնոլոգիական օբյեկտներին։
«Կոչ ենք անում Ուկրաինայի քաղաքացիներին, որոնք ուկրաինացի ազգայնականների կողմից ներգրավվում են Ռուսաստանի դեմ սադրանքներ իրականացնելու համար, ինչպես նաև Կիևի բնակիչներին, որոնք բնակվում են վերահեռարձակումների հանգույցների կողքին, լքել իրենց տները»,- ասել էր Կոնաշենկովը:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։