Լոռու մարզում ոստիկանները հատուկ միջոցառում են իրականացրել, որի արդյունքում հայտնաբերել են ապօրինի զենք-զինամթերք ու թմրամիջոցներ, տեղեկանում ենք ոստիկանության պաշտոնական կայքից։
Լոռու մարզային վարչության ենթակա ստորաբաժանումներում տվյալներ էին ստացվել, որ մարզի տարբեր բնակավայրերում պահում են ապօրինի զենք-զինամթերք, օգտագործում և իրացնում են թմրամիջոցներ։
Հարուցված քրգործի շրջանակներում ոստիկանները խուզարկություններ են կատարել Վանաձոր, Ալավերդի, Թումանյան, Ստեփանավան, Տաշիր, Սպիտակ քաղաքներում, ինչպես նաև Գուգարք ու Մարգահովիտ գյուղերում։
Հայտնաբերվել են չորս ատրճանակ, ինքնաշեն ինքնաձիգ, որսորդական հրացան, տարբեր տրամաչափի և հրազենների 126 փամփուշտ, նռնակ, նռնակի պայթուցիչ, սառը զենք, մահակ, պլաստամասե տարաներով վառոդ։
Հայտնաբերվել են նաև մեթադոնի լուծույթ, հոգեներգործուն հաբեր, 300 գրամից ավելի մարիխուանայի նմանվող զանգված և այլն։ Բացի այդ, հայտնաբերվել են մեքենայի մասեր ու տնտեսական ապրանքներ, որոնք, նախնական տվյալներով, գողացված են։
Իսկ ՃՈ ոստիկանները ուժեղացված ծառայություն են իրականացրել Լոռիում՝ հայտնաբերելով 22 գրամից ավելի մարիխուանայի նմանվող զանգված, սառը զենքեր, մահակներ և այլն։ Ուժեղացված ծառայության ընթացքում բերման են ենթարկվել 52 անձ։