ԵՐԵՎԱՆ, 23 փետրվարի – Sputnik. Վեդու ջրամբարի շինարարությունը, որն իրականացվում է Ֆրանսիայի Հանրապետության կառավարության աջակցությամբ, նախատեսվում է ավարտել մինչև 2022թ–ի տարեվերջ։
Այս մասին այսօր ՀՀ կառավարության նիստում հայտնեց ՀՀ տարածքային կառավարման ու ենթակառուցվածքների նախարար Գնել Սանոսյանը։
«Պատվարի կառուցման հիմնական աշխատանքները շուրջ 80 տոկոսով իրականացված են»,– ասաց Սանոսյանը` հիշեցնելով, որ նախապես շինարարության ավարտը նախանշված էր 2021թ–ի մարտին, բայց 2020թ–ի համավարակի ու պատերազմի պատճառով ժամկետը վերանայվել է։
ՀՀ վարչապետ Նիկոլ Փաշինյանն էլ նշեց, որ խոստացված ևս 15 փոքր ջրամբարների կառուցման ծրագրերի ուղղությամբ արդեն որոշակի քայլեր կատարվում են։
«Սկսում ենք դիտարկումները, թե որտեղ կարելի է ջրամբարներ կառուցել։ Մասնագիտական աշխատանքներից հետո, երբ որ հաստատվում է տարածքը, արդեն սկսում ենք նախագծման աշխատանքերը»,– ասաց նա։
Փաշինյանը հայտնեց նաև, որ 2022թ–ի պետբյուջեով 2 մլրդ դրամ է հատկացվել Քասախի, Արգիճի, Աստղաձորի, Ելփինի, Արթիկի, Լիճքի և Եղվարդի ջրամբարների նախագծման համար։
«Նախագծման աշխատանքների ընթացքում մենք դիտարկում ենք նաև էներգետիկ հնարավորությունները, թե ինչքանով կարող են այդ ջրամբարները նաև էներգետիկ պոտենցիալ ունենալ։ Այսինքն` ջրամբարների հոսքերի վրա ՀԷԿ–եր տեղադրելու նպատակահարմարությունը»,– ասաց Փաշինյանը։
Նշենք, որ Վեդիի ջրամբարը կառուցվում է 394.4 մլն եվրո դրամաշնորհային միջոցներով։