ԵՐԵՎԱՆ, 23 փետրվարի – Sputnik. Խորհրդարանական ընդդիմության առաջարկով հրավիրված Ազգային ժողովի արտահերթ նիստը տապալվեց քվորում չլինելու պատճառով։
«ԱԺ կանոնակարգ» սահմանադրական օրենքի 51-րդ հոդվածի համաձայն՝ պատգամավորների գրանցումը, սակայն, կշարունակվի մինչև 16:00-ը, որից հետո քվորում չապահովվելու դեպքում ԱԺ նիստը կհայտարարվի չանցկացված։
Նշենք, որ 12։00-ի դրությամբ նիստին գրանցվել էր 29 պատգամավոր։ Հիշեցնենք` ընդդիմադիր 2 խմբակցություններում 35 պատգամավոր կա, որոնցից 6-ը` «Պատիվ ունեմ»–ում։
Նշենք, որ նիստի օրակարգում ընդգրկված է մեկ հարց` ԱԺ «Հայաստան» խմբակցության հեղինակած «Ադրբեջանի և Թուրքիայի խորհրդարանների կողմից «Շուշիի հռչակագրի» վավերացման կապակցությամբ» ԱԺ հայտարարության նախագիծը:
Նիստերի դահլիճից դուրս, լրագրողների հետ ճեպազույցում, մեկնաբանելով նիստի տապալումը, ԱԺ փոխնախագահ, «Հայաստան» խմբակցության պատգամավոր Իշխան Սաղաթելյանն ընդդիմության բացակայությունը նիստից «բոյկոտ» անվանեց` հավելելով, որ ՀՀ ԱԺ–ն պարտավոր էր հայտարարություն ընդունել ու դրանով ներկայացնել Հայաստանի դիրքորոշումը հակահայկական այդ հռչակագրի նկատմամբ։
«Սրանով քաղաքական մեծամասնությունն առանց որևէ լուրջ փաստարկի բոյկոտեց, իսկ ԱԺ արտաքին հարաբերությունների հանձնաժողովը բացասական եզրակացություն տվեց այս նախագծին։ Քաղաքական մեծամասնությունն, ըստ էության, վավերացնում է այդ փաստաթուղթը և սպասարկում Թուրքիայի ու Ադրբեջանի շահերը»,– ասաց նա։
Հիշեցնենք, որ Թուրքիայի նախագահ Ռեջեփ Թայիփ Էրդողանը Ադրբեջանի նախագահ Իլհամ Ալիևի ուղեկցությամբ հունիսի 15-ին այցելել էր նախ Ֆիզուլի, ապա նաև Շուշի, որտեղ տեղի է ունեցել երկկողմ համաձայնագրի (Դաշնակցության մասին հռչակագրի) ստորագրումը:
Երկու երկրների խորհրդարաններն ավելի ուշ վավերացրել են այդ փաստաթուղթը։