ԵՐԵՎԱՆ, 22 փետրվարի – Sputnik. Արցախի Հանրապետության ԱԺ նախագահ Արթուր Թովմասյանը ողջունել է ՌԴ նախագահ Վլադիմիր Պուտինի որոշումը՝ Դոնեցկի և Լուգանսկի Ժողովրդական հանրապետությունների անկախությունը ճանաչելու մասին։
Արցախի խորհրդարանի ղեկավարը հանդես է եկել ուղերձով, որտեղ կարծիք է հայտնել, որ ճանաչումը հիմք կհանդիսանա արտաքին սպառնալիքներից ԴԺՀ և ԼԺՀ բնակիչների պաշտպանության և անվտանգության երաշխիքների ապահովման, միջազգային խաղաղության և տարածաշրջանային կայունության ամրապնդման համար։
«Շնորհավորում ենք Դոնբասի ժողովրդին՝ զույգ հանրապետությունների ինքնորոշման իրավական-քաղաքական ճանաչման առիթով»,– ասված է Արթուր Թովմասյանի շնորհավորական ուղերձում։
Հիշեցնենք, որ Ռուսաստանի նախագահ Վլադիմիր Պուտինը փետրվարի 21-ին Անվտանգության խորհրդի արտահերթ մեծ նիստից հետո ուղերձով դիմել է ՌԴ քաղաքացիներին, հայտարարել է, որ անհրաժեշտ է համարում որոշում ընդունել անհապաղ ճանաչել ԼԺՀ-ի և ԴԺՀ-ի ինքնիշխանությունը, քանի որ նրանք, ովքեր ընտրել են արյունահեղության, բռնության և անօրինականության ուղին, չեն ճանաչել և չեն ճանաչում Դոնբասի հակամարտության որևէ այլ լուծում, բացի ռազմականից:
Հեռուստաուղերձում ՌԴ նախագահը խոսել էր պատմական արդարությունը վերականգնելու անհրաժեշտության մասին` ասելով. «Ժամանակակից Ուկրաինան ամբողջությամբ ստեղծվել է Կոմունիստական Ռուսաստանի կողմից։ Լենինն ու նրա համախոհները ստեղծեցին ժամանակակից Ուկրաինան՝ տարածքներ պոկելով Ռուսաստանից։ Ոչ ոք բնակիչներին ոչինչ չհարցրեց։ Բոլշևիկները Դոնբասը բառացիորեն պոկեցին Ռուսաստանից ու մտցրին Ուկրաինայի կազմի մեջ»։
Պուտինը ՌԴ Դաշնային ժողովին կոչ էր արել վավերացնել երկու հանրապետությունները ճանաչող փաստաթղթերը, ինչպես նաև բարեկամության ու փոխադարձ օգնության մասին պայմանագրերը։
Հարցի քննարկումը ԴԺ–ում նախատեսված է այսօր։