ԵՐԵՎԱՆ, 21 փետրվարի – Sputnik. ՔՊ–ն, չվավերացնելով Շուշիի հռչակագրի մասին ընդդիմության հայտարարությունը, մեսիջ տվեց Թուրքիային և Ադրբեջանին, որ պատրաստ է «խաղաղության»։ ԱԺ–ում լրագրողների հետ ճեպազրույցում նման կարծիք հայտնեց «Հայաստան» խմբակցության պատգամավոր Անդրանիկ Թևանյանը։
Հայտնել էինք, որ ՔՊ–ն չի միանա այդ հայտարարությանը, քանի որ կարծում են, որ ՀՀ ԱԳՆ–ն արդեն իսկ արձագանքել է դրան և կրկնվել պետք չէ։ Նախագծի հաստատմանն իշխանությունը քվեարկեց ձեռնպահ, և քանի որ մեծամասնություն էր կազմում հանձնաժողովում, նախագիծը չընդունվեց։
«Փետրվարի 23-ին, ժամը 12-ին, ԱԺ արտահերթ նիստ կգումարվի, որտեղ պետք է ներկայացվեր նաև այս հարցը, սակայն իշխանության այսօրվա մոտեցումից հետո ենթադրում եմ, որ կարող են նիստը տապալել։ Այսօր ականատես եղանք ամոթալի քաղաքական որոշման, որը կայացրեց իշխանությունը։ Որ ասեմ` անսպասելի էր, սուտ կլինի, սակայն որ թուրքամետ քաղաքականությունը կողջունի իշխող խմբակցությունը, չէի պատկերացնում»,–ասաց Թևանյանը։
Նրա խոսքով` իշխանությունը մերժեց «Շուշիի հռչակագիրը» դատապարտող հայտարարությունը` դրանով իսկ կողմ արտահայտվելով այդ հռչակագրին։ Թևանյանը հավելեց, որ սա խաղաղասիրական քաղաքականության դրսևորում էր, որը բերելու է նոր ողբերգության։
Պատգամավորը կարծում է, որ այսպես խաղաղություն չի լինելու` թուրքական ախորժակը և ադրբեջանցիների նկրտումները ՀՀ տարածքի նկատմամբ մեծանալու են։
Թևանյանն իր խոսքն ամփոփեց` ասելով, որ իշխանության պահվածքը Հայաստանի անկախության հռչակագրից հրաժարվել էր։
Հիշեցնենք, որ Թուրքիայի նախագահ Ռեջեփ Թայիփ Էրդողանը Ադրբեջանի նախագահ Իլհամ Ալիևի ուղեկցությամբ 2021–ի հունիսի 15-ին այցելել էր նախ Ֆիզուլի, ապա նաև Շուշի, որտեղ տեղի էր ունեցել երկկողմ համաձայնագրի (Դաշնակցության մասին հռչակագրի) ստորագրումը:
Երկու երկրների խորհրադարաններն էլ արդեն վավերացրել են այն։