Ավարտվեցին Պեկինում անցկացվող 24-րդ ձմեռային օլիմպիական խաղերը։ Այժմ Չինաստանի մայրաքաղաքում ընթանում է փակման շքեղ արարողությունը։ Օլիմպիադան մեկնարկել էր փետրվարի 4-ին։
Արարողության ընթացքում տեղի կունենա Միլանում և Կորտինա դ'Ամպեցոյում հաջորդ ձմեռային Օլիմպիական խաղերի ներկայացումը, օլիմպիական դրոշի փոխանցումը Միջազգային օլիմպիական կոմիտեից (ՄՕԿ) իտալական քաղաքների քաղաքապետներ Ջուզեպե Սալեին և Ջանպյետրո Գեդինեին։
Официальная церемония закрытия зимних Олимпийских игр (20 февраля 2022). Пекин
© Sputnik / Asatur Yesayants
Փակման արարողության ավարտին ՄՕԿ-ի նախագահ Թոմաս Բախը Պեկինի Օլիմպիական խաղերը կհայտարարի փակված: Այնուհետև օլիմպիական կրակը կհանգցնեն։ Այս տարվա խաղերին մասնակցել են մարզիկներ ավելի քան 90 երկրից, խաղարկվել է մրցանակների 109 հավաքածու:
Մեդալային հաշվարկով հաղթող Է դարձել Նորվեգիայի հավաքականը, որը նվաճել է 16 ոսկե, 8 արծաթե, 13 բրոնզե մեդալ: Երկրորդ տեղում Գերմանիայի հավաքականն է (12-10-5), երրորդում՝ Չինաստանի հավաքականը (9-4-2): Ինչ վերաբերում է մրցանակների ընդհանուր թվին, ապա առաջինը նորվեգացիներն են (37), երկրորդը՝ ռուսները (32), երրորդը՝ գերմանացիները (27):
Հիշեցնենք՝ Հայաստանը օլիմպիական խաղերում ներկայացնում էին գեղասահորդներ Թինա Կարապետյանն ու Սիմոն Սենեկալը, դահուկորդներ Կատյա Գալստյանը, Անգելինա Մուրադյանը, Միքայել Միքայելյանը։
Официальная церемония закрытия зимних Олимпийских игр (20 февраля 2022). Пекин
© Sputnik / Asatur Yesayants
Դահուկորդ Միքայել Միքայելյանը 15 կմ դասական ձևում 61-րդ տեղն է զբաղեցրել, իսկ սքիաթլոն 15 կմ և 15 կմ ազատ ոճերում՝ 47-րդը:
Դահուկորդ Կատյա Գալստյանը դահուկավազքի 10 կմ դասական ձևում 74-րդ տեղն է զբաղեցրել, իսկ Անգելինա Մուրադյանը՝ 93-րդ։
Գեղասահորդներ Թինա Կարապետյանը և Սիմոն Սենեկալը 20 զույգի մեջ զբաղեցրել են 18-րդ տեղը։
Լեռնադահուկորդ Հարություն Հարությունյանը չմասնակցեց խաղերին` կորոնավիրուսով վարակվելու պատճառով։