ԵՐԵՎԱՆ, 18 փետրվարի - Sputnik. Մարզական արբիտրաժային դատարանը (CAS) հաստատել է, որ արգելված տրիմետազիդին նյութը կարող էր պատահական հայտնվել ռուս գեղասահորդուհի Կամիլա Վալիևայի օրգանիզմում։ RT-ի հաղորդմամբ՝ տեղեկությունը նշված է CAS-ի հրապարակած փաստաթղթում։
Այս վարկածը Կամիլա Վալիևայի դրական դոպինգի գործով դատավարության ժամանակ առաջ է քաշել նրա ընտանիքը։ Բանն այն է, որ գեղասահորդուհի պապիկը, որը պարբերաբար նրան պարապմունքի է տանում, ընդունում է տրիմետազիդին, որը նշանակվել է նրան սրտի վիրահատությունից հետո։
«Մարզիկի ներկայացուցիչները հայտարարել են, որ նա դիտավորյալ չի օգտագործել արգելված նյութը։ Այդ նյութը, ամենայն հավանականությամբ, հայտնվել է նրա օրգանիզմում կենցաղային ճանապարհով՝ նրա պապիկի պատճառով, որն օգտագործում է տրիմետազիդինը սրտի վիրահատությունից հետո»,- նշված է Մարզական արբիտրաժային դատարանի որոշման պատճառաբանական մասում:
ITA-ն փետրվարի 11-ին հայտնել է, որ Վալիևայի՝ 2021 թվականի դեկտեմբերի 25-ին հանձնած դոպինգ-թեստը, տրիմետազիդինի դրական արդյունք է տվել:
CAS-ը արտագնա նիստից հետո որոշել էր, որ Վալիեւան կկարողանա մասնակցել անհատական մրցումներին, ՄՕԿ-ի, ISU-ի ու WADA-ի բողոքարկումները գեղասահորդուհու ժամանակավոր հեռացման վերաբերյալ մերժվել էին։
Սակայն գեղասահորդը չկարողացավ հաղթահարել հոգեբանական ճնշումն ու ձախողվեց մրցումների եզրափակիչում։ Կարճ ծրագրից հետո առաջատարը Վալիևան շատ անհաջող հանդես եկավ ազատ սահքում, ինչը նրան զրկեց ոչ միայն ոսկե մեդալից, այլև ընդհանուր մրցանակային տեղերից:
Պեկինի օլիմպիադայում հաղթանակ է տարել մեկ այլ ռուսաստանցի՝ Աննա Շչերբակովան։ Արծաթե մեդալը նույնպես բաժին է հասել ռուսական թիմի ներկայացուցիչ Ալեքսանդրա Տրուսովային, որը դարձել է պատմության մեջ առաջին գեղասահորդը, որը հինգ քառակի ցատկ է կատարել մեկ ծրագրում: