Միայն ՌԴ–ի հետ համագործակցությունն է Հայաստանի անվտանգության երաշխիքը. Քոչարյան

ԵՐԵՎԱՆ, 17 փետրվարի – Sputnik. Միայն ՌԴ հետ համագործակցությունն է Հայաստանի անվտանգության երաշխիքը։ Այսօր հրավիրված ասուլիսի ժամանակ հայտարարեց ՀՀ երկրորդ նախագահ Ռոբերտ Քոչարյանը` հավելելով, որ միակ աշխատող տարբերակը ՌԴ կողմից անվտանգության երաշխիքի ապահովումն է։

Նրա խոսքով` պատերազմը մի շարք խնդիրներ բացահայտեց. Ռուսաստանի հետ սահմանի բացակայությունը ցույց տվեց ՌԴ–ի միջամտության և օժանդակության որոշակի սահմաններ։ Ավելին` ըստ Քոչարյանի` մինչ օրս չկա պատասխան, թե ինչու էր Վրաստանի օդային տարածքը փակ ռազմական բեռնափոխադրումների համար։ Առաջին երկու շաբաթների ժամանակ փակ էր նաև Իրանի օդային տարածքը։ Քոչարյանը կարծում է, որ այս երկու գործոնը շեշտակի ազդեցություն ունեցան պատերազմի արդյունքների վրա։

Նա նշեց, որ զրոյից պետք է նոր ռազմաարդյունաբերական համալիր ստեղծենք, զինամթերքը համալրենք։ Սակայն այս ամենն ինքնուրույն անել չենք կարող և պետք է հասկանալ, թե ՌԴ–ն ինչ ծավալով է պատրաստ աջակցել մեզ։

Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։

2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։

Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:

Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: