Վթար Տավուշի անտառներում. մահացել է Գոշի նախկին գյուղապետի որդին

ԵՐԵՎԱՆ, 12 փետրվարի – Sputnik. Այսօր՝ փետրվարի 12-ին, խոշոր ու ողբերգական ավտովթար է տեղի ունեցել Տավուշի մարզում։ Կա զոհ։ Տեղեկությունը հայտնում է shamshyan.com–ը։

«Ժամը 06։00-ի սահմաններում արտակարգ իրավիճակների նախարարության փրկարար ծառայության 9-11 ճգնաժամային կառավարման կենտրոն ահազանգ է ստացվել, որ Դիլիջան խոշորացված համայնքի Գեղատափ բնակավայրի տարածքում՝ անտառային հատվածում, ավտոմեքենա է գլորվել անտառում, և կան տեղեկություններ, որ տուժած քաղաքացիներ կան։

Պարզվել է, որ ՈւԱԶ մակնիշի ավտոմեքենան անտառամիջյան ճանապահի երթևեկելի գոտուց դուրս է եկել և մոտ 120 մետր գլորվել ու կողաշրջված վիճակում բախվել հաստաբուն ծառին։

Փրկարարներն ավտոմեքենայից դուրս են բերել Երևանի բնակիչ՝ 27-ամյա Լ. Հովակիմյանին, ում այնուհետև իրենց ավտոմեքենայով դժվարանցանելի ճանապարհով մոտ 12 կմ տեղափոխել են ու մոտեցրել շտապօգնության ավտոմեքենային։

Այնուհետև ավտոմեքենայից մոտ 25 մետր հեռավորության վրա հայտնաբերվել է վարորդի՝ Տավուշի մարզի բնակիչ, 32-ամյա Ս. Վերանյանի դին։

Ճանապարհային ոստիկանները վթարի վայրում՝ դիակից քիչ հեռու, հայտնաբերել են որսորդական հրացան։

Դաժան վթար Տավուշում. կա 2 զոհ, մեկը 12–15 տարեկան տղա է

Ճանապարհը մոտ 14 կմ վտանգավոր էր, քանի որ անտառային հատված էր ու միայն ամենագնացով էր հնարավոր մոտենալ վթարի վայրին։

Փաստի առթիվ Դիլիջանի քննչական բաժնում ՀՀ քրեական օրենսգրքի 242–րդ հոդվածի 2-րդ մասի հատկանիշներով հարուցվել է քրեական գործ։

Դեպքի վայրում հավաքված քաղաքացիներն ասել են, որ մահացածը Գոշի նախկին գյուղապետ Հովսեփ Վերանյանի որդին է։