Պեկինի օլիմպիական խաղերում այսօր որակավորման փուլը հաղթահարած Թինա Կարապետյանն ու Սիմոն Սենեկալը ելույթից հետո Պեկինում աշխատող Sputnik Արմենիայի թղթակցին ասել են, որ շատ ուրախ են այս պահի արդյունքների համար, քանի որ Պեկին են եկել հենց ազատ ծրագիրը ներկայացնելու նպատակով։
«Դա հրաշալի էր։ Մենք գոհ ենք մեր ելույթից։ Իսկապես լավ սահեցինք։ Ավելին չէինք էլ կարող երազել։ Ուրախ ենք, որ կարող ենք ներկայացնել նաև մեր ազատ ծրագիրը»,–ասել է գեղասահորդուհի Թինա Կարապետյանը։
Հիշեցնենք` Հայաստանը ներկայացնող Թինա Կարապետյան- Սիմոն Սենեկալ պարային զույգը այսօր ռիթմ-պարից (կարճ ծրագիր) հետո իրավունք վաստակեց օլիմպիական խաղերում հանդես գալ ազատ ծրագրում։
Ռիթմ պարը հայկական զույգի մոտ Արետա Ֆրանկլինի Respect (Հարգանք) և Bridge Over Troubled Water (Կամուրջ վարար ջրի վրայով) երգերի հնչյունների ներքո էր։ Մեր զույգը սահադաշտ դուրս եկավ տասներորդը։
Ստանալով 65,87 միավոր` Հայաստանը ներկայացնող զույգն արդեն հանդես եկած տասը զույգերի մեջ զբաղեցրեց վեցերորդ տեղը, ինչը նշանակում է, որ մեր մարզիկներն անցան որակավորումը և հանդես կգան նաև ազատ ծրագրով։
Պարային զույգերում օլիմպիական չեմպիոն և մրցանակակիր զույգերը հայտնի կդառնան փետրվարի14-ին։
Այդ օրը ազատ ծրագրով հանդես կգան նաև Թինա Կարապետյանն ու Սիմոն Սենեկալը։