Հայաստանի և ԵՄ–ի միջև ընդհանուր ավիացիոն գոտին կհեշտացնի տարբեր երկրների ավիաընկերությունների հետ համագործակցությունը և ավելորդ բյուրոկրատիան, որը նախկինում կար, այժմ այլևս խանգարող հանգամանք չի հանդիսանա, Sputnik Արմենիայի հետ զրույցում նման տեսակետ հայտնեց ավիացիայի ոլորտի փորձագետ Նավիկ Խաչատրյանը։
«Նման համաձայնագիր արդեն կնքվել էր Վրաստանի, Մոլդովայի և Ուկրաինայի հետ։ Այն բավականին հեշտացնում է նաև նավիգացիոն բնույթի խնդիրները, մեկը մյուսի տարածքով թռչելու հարցերը։ Եթե առաջ ԻԿԱՕ–ի պահանջներով մի երկրից մեկ այլ պետություն, այնուհետև երրորդ երկիր մեկնելու համար առաջանում էին խնդիրներ, որը կոչվում էր «հինգերորդ ազատության խախտում» և վերաբերում էր հատկապես նրանց, որոնք ԵՄ անդամ երկրներ չէին, հիմա արդեն կարելի է խուսափել ավելորդ թղթաբանությունից և իրականացնել պարզ, մատչելի, թափանցիկ ավիափոխադրումներ միանգամից մի քանի երկրների միջև»,– ասաց ավիացիայի ոլորտի փորձագետը։
Խաչատրյանի դիտարկմամբ` ընդհանուր ավիացիոն գոտու պայմանագիրը զարկ կտա նոր ավիաընկերությունների ստեղծմանը տեղական շուկայում և կմեծացնի արտերկրից դեպի Հայաստան թռչող ավիաընկերությունների չվերթերի հաճախականությունը։ Խաչատրյանը նշեց, որ 2018 թվականին անձամբ ուսումնասիրել է պայմանագիրը, որը նախապես վավերացրել էին ԵՄ անդամ բոլոր երկրները, հետևաբար Հայաստանի համար նույնպես ողջունելի է։
Փորձագետի խոսքով` նախկինում եղել է ընթացակարգ, ըստ որի` դիմում էին Քաղավիացիայի գլխավոր վարչությանը դեպի Հայաստան թռիչքներ իրականացնելու թույլտվություն ստանալու համար, այժմ հարցը զգալիորեն դյուրացվել է. իհարկե, դարձյալ կարիք կլինի դիմել Քաղավիացիայի գլխավոր վարչությանը, սակայն մերժելու հիմքեր չկան, քանի որ Հայաստանը պետական մակարդակով միացել է ընդհանուր ավիացիոն գոտու համաձայնագրին։
Նշենք, որ ՀՀ կառավարությունը հավանություն է տվել 2021 թվականի նոյեմբերի 15-ին Բրյուսելում ստորագրված` Հայաստանի և ԵՄ անդամ պետությունների միջև ընդհանուր ավիացիոն գոտի ունենալու նախագծին։ Նախագծի հիմնավորման մեջ նշվում է, որ համաձայնագրի նպատակներն են ստեղծել ընդհանուր ավիացիոն գոտի` ապահովելով կողմերի շուկաների հասանելիությունը հավասար մրցակցային պայմաններով: