ՀՀ կառավարությունը բարի կամք դրսևորեց և ինչպես մտցրել էր, այնպես էլ միակողմանի հանեց թուրքական ապրանքների էմբարգոն, բայց Թուրքիայի կառավարությունը չի հանել դեռ 1993 թվականի մայիսին Հայաստանի նկատմամբ սահմանած արգելքը։ Կողմերը տնտեսական արգելքներն ու սահմանափակումները պետք է երկուստեք չեղարկեն, Sputnik Արմենիայի հետ զրույցում ասաց «Ինտեգրացիա և զարգացում» ՀԿ նախագահ, Եվրասիական փորձագիտական ակումբի համակարգող Արամ Սաֆարյանը։
«Արցախյան 44–օրյա պատերազմից հետո Թուրքիայի նկատմամբ մեր կառավարության էմբարգոն դրական ազդեցություն է ունեցել Հայաստանի տնտեսական վիճակի, մասնավորապես՝ արդյունաբերության որոշ ճյուղերի զարգացման և արտահանման ծավալների մեծացման վրա։
Մեկ տարվա ընթացքում, երբ թուրքական ապրանքները Հայաստան չեն ներկրվել, հայ տնտեսվարողները հասցրել են հատկապես վերամշակող արդյունաբերության որոշ ճյուղերում արագ ներդրումների հաշվին ստանալ արտոնություններ և այսօր, օրինակ, տնտեսական ու մթերային խանութներում կարելի է տեսնել տեղական արտադրանք, որի մի մասն էլ արտահանվել է ԵԱՏՄ–ի ուղղությամբ, ինչը բավականին բարելավել է մեր տնտեսվարողների դիրքերը»,– նշեց Եվրասիական փորձագիտական ակումբի համակարգողը։
Սաֆարյանի դիտարկմամբ` հայկական ապրանքների գները շատ մատչելի են, և պատահական չէ, որ 2016-19 թվականներին մենք ունեցել ենք արտահանման երկնիշ աճ, ինչն ահռելի ցուցանիշ է, շատ լուրջ հաջողություն և դա խոսում է այն մասին, որ ԵԱՏՄ շուկան, գլխավորապես ռուսաստանյան շուկան, մեծ տեղ և պոտենցիալ ունի մեր արտահանման ծավալները մեծացնելու համար։
Ըստ այդմ`Սաֆարյանին հետաքրրքում է այն հարցը, թե թուրքական էմբարգոն հանելու դեպքում, երբ թուրքական ապրանքները մտնեն Հայաստան ու այստեղից էլ հասնեն ԵԱՏՄ շուկաներ, արդյոք մեր արտադրողները կդիմանան մրցակցությանը։
Տնտեսագետների կարծիքով` իրավիճակը պարզ կդառնա երկու տարի անց, երբ պարզ կդառնա՝ արդյոք տեղի արտադրողները կարողացան առավելագույն չափով օգտվել 2021 թվականին տրված հնարավորությունից։
Պարզ կդառնա նաև` պե՞տք է արդյոք, որ ՀՀ կառավարությունը որոշ ֆիտոսանիտարական, մաքսային և այլ կարգի ճշտումներ մտցնի Թուրքիայի հետ առևտրի հարցում, որի նպատակը կլինի ցածրորակ ապրանքների ներկրման առջև պատնեշ դնելը, ինչը թույլ կտա պաշտպանել հայ տնտեսվարողների արտադրանքը թուրքական նմանատիպ ապրանքներից։
Նշենք, որ երևանցիների 54.6 տոկոսը դեմ է հայ-թուրքական սահմանի բացմանը։ Այդ մասին հայտնել է «GALLUP International»-ի ղեկավար Արամ Նավասարդյանը՝ ներկայացնելով Երևանում իրականացված հետազոտության արդյունքները։
Հիշեցնենք, որ Թուրքիայի ու Հայաստանի միջև դիվանագիտական հարաբերություններ չկան, 1993 թվականից սահմանը փակ է Անկարայի նախաձեռնությամբ։