ԵՐԵՎԱՆ, 8 փետրվարի – Sputnik. Մասիսի փրկարարներն այսօր Սևջուր գետից դուրս են բերել տղամարդու կիսաքայքայված դի։ Տեղեկությունը հայտնում է shamshyan.com–ը։
Ըստ հաղորդագրության` ՀՀ արտակարգ իրավիճակների նախարարության փրկարար ծառայության 9-11 ճգնաժամային կառավարման կենտրոնը ժամը 12։05-ի սահմանում ահազանգ է ստացել, որ Մասիս-Ռանչպար ավտոճանապարհի՝ Հրազդան կամրջի տակով անցնող Սևջուր գետի մեջ դի կա։
Դեպքի վայր մեկնած փրկարարները նավակով մոտեցել են կամրջի բետոնե սյուների տակ գտնվող դիակին, ապա ճոպանների միջոցով դուրս բերել այն։
Դատաբժշկի նախնական եզրակացության համաձայն՝ արտաքին զննությամբ դիակի վրա բռնության հետքեր չկան, սակայն այն կիսաքայքայված վիճակում է։
Այս պահին անհրաժեշտ օպերատիվ միջոցառումներ են ձեռնարկվում դիակի ինքնությունը պարզելու համար։
Նշանակվել են մի շարք փորձաքննություններ, այդ թվում՝ դիակի դատաբժշկական։