ԵՐԵՎԱՆ, 6 փետրվարի – Sputnik. Ձմեռային օլիմպիական խաղերի դահուկորդների սկիաթլոնի մրցումներում 47-րդ տեղը զբաղեցրած Միքայել Միքայելյանը կարծում է, որ հաջորդ մրցույթում ավելի լավ արդյունքի կհասնի։ Այդ մասին նա ասաց Sputnik Արմենիայի հետ հարցազրույցում։
Սկիաթլոնի մրցումները յուրաքանչյուր դահուկորդից յուրահատուկ ունիվերսալիզմ են պահանջում։ Առաջին 15 կմ մրցատարածությունը մարզիկներն անցնում են դասական ոճով, իսկ դահուկները փոխելուց հետո արդեն դեպի վերջնագիծ են գնում ևս 15 կմ ազատ ոճով։
Միքայել Միքայելյանը դասական ոճից հետո աղյուսակում 35-րդ տեղում էր, բայց երկրորդ հատվածում հայ դահուկորդը որոշակի խնդիրներ է ունեցել, այդ թվում՝ գլխապտույտ։ Չնայած ի տարբերություն շատ դահուկորդների (21 դահուկորդ չհասան վերջնագիծ)՝ հայ մարզիկը անցավ ամբողջ մրցուղին։
Sputnik Արմենիայի հետ զրույցում Միքայելը վստահեցրեց, որ հաջորդ մեկնարկը իր համար անհամեմատ հաջող է լինելու։ Փետրվարի 11-ին մեր մարզիկը մասնակցելու է 15 կմ դասական ոճով մրցումներին։