Փետրվարի 6-ին Պեկինում Հայաստանի մարզիկներից առաջինը մրցապայքարի դուրս կգա դահուկորդ Միքայել Միքայելյանը։ Նա հանդես կգա սկիատլոն մրցաձևում (15 կմ դասական ոճ + 15 կմ ազատ ոճ)։
«Ինձ համար գոհացնող արդյունք կլինի, եթե հայտնվեմ լավագույն 30-յակում»,– Sputnik Արմենիայի հետ զրույցում ասաց Միքայելյանը` նշելով, որ դա համարվում է դահուկավազքի էլիտան։
Անդրադառնալով Պեկինում սահմանված կորոնավիրուսային սահմանափակումներին` նա նշեց, որ դրանք աննախադեպ են։ Միայն մարզումների ժամանակ է հնարավոր հանել դիմակը, բայց դահուկորդը վստահեցնում է, որ բոլորը հավասար պայմաններում են։
Հայաստանի դահուկավազքի հավաքականը օլիմպիական խաղերին նախապատրաստվել է Աշոցքում։ Մեր դահուկորդը շատ նմանություններ է գտել Հայաստանի հյուսիսային սահմանների ու Չինաստանի մայրաքաղաքի կլիմայական պայմանների միջև։
«Պեկինի ու Աշոցքի եղանակային պայմանները իրար շատ նման են»,– Sputnik Արմենիային ասաց նա։
Դահուկորդ Միքայել Միքայելյանը բացառիկ հարցազրույց է տալիս Sputnik Արմենիային (5 փետրվարի, 2022թ). Պեկին
© Sputnik / Asatur Yesayants
Միքայել Միքայելյանը, բացի սկիատլոնից, հանդես է գալու նաև դասական ոճով 15 կմ մրցատարածությունում։ Այսպիսով` հայ դահուկորդը օլիմպիական խաղերում կունենա երկու մեկնարկ։ Իսկ կանանց մրցումներում Կատյա Գալստյանն ու Անգելինա Մուրադյանը կմասնակցեն 10կմ դասական ոճում մրցատարածության մրցումներին, բացի այդ Կատյա Գալստյանը հանդես կգա սպրինտում։
Հիշեցնենք` Պեկինի 24-րդ ձմեռային օլիմպիական խաղերի բացման արարողությունը կայացավ փետրվարի 4-ին, մրցումները կավարտվեն փետրվարի 20-ին։ Չինաստանի մայրաքաղաքը դարձել է պատմության մեջ առաջին քաղաքը, որն ընդունել է ամառային և ձմեռային օլիմպիական խաղերը:
Հայաստանը պետք է ներկայացնեին 6 մարզիկ՝ դահուկորդներ Միքայել Միքայելյանը, Կատյա Գալստյանը, Անգելինա Մուրադյանը, լեռնադահուկորդ Հարություն Հարությունյանը, գեղասահորդներ Թինա Կարապետյանը և Սիմոն Սենեկալը: Սակայն լեռնադահուկորդ Հարություն Հարությունյանի մոտ կորոնավիրուս է հայտնաբերվել, և նա չի մեկնել Պեկին։
Մրցումները կանցկացվեն ինչպես նոր օբյեկտներում, այնպես էլ արդեն գոյություն ունեցող մրցասպարեզներում։ Կօգտագործվեն նաև այն կառույցները, որոնք մնացել են 2008 թվականի ամառային օլիմպիական խաղերից հետո։
Հայաստանի մարզական պատվիրակությունը Պեկին է մեկնել փետրվարի 1-ին։