ԵՐԵՎԱՆ, 3 փետրվարի, Sputnik. Այն տարածքը, որտեղ այժմ զորքով նստած են ադրբեջանցիները, ՀՀ սուվերեն տարածքն է։ Կառավարության նիստից հետո լրագրողների հետ ճեպազրույցում այս մասին հայտարարեց ՀՀ նախագահի թեկնածու Վահագն Խաչատուրյանը:
«Այն տարածքը, որտեղ այժմ նստած է թշնամին, ՀՀ տարածքն է, և երբ այդ հարցը քննարկվի, և մենք, ի վերջո, նրանց հետ համաձայնության գանք, համոզված եմ, որ այդ տարածքում նրանք չեն լինի։ Մենք հիմա այդ քաղաքականությունն ենք տանում»,–ասաց Խաչատուրյանը։
Նրա խոսքով` տարածքների ճշգրտումներ կատարելուց հետո որևէ մեկը մեր սուվերեն տարածքում չի լինելու։
Հարցին, թե «իշխանության քաշը» չի՞ հերիքում, որ այնպես անեն` նախ զորքն ադրբեջանցիները հանեն ՀՀ տարածքից, հետո արդեն սահմանների ճշգրտումներ լինեն` Խաչատուրյանը պատասխանեց, որ իշխանության քաշը հերիքում է, և հիմա նման բանակցություների մեջ են։
Եթե այս հարցով ինչ–որ արդյունքներ լինեն, ապա Խաչատուրյանը վստահեցնում է` կբարձրաձայնեն այդ մասին։
Հիշեցնենք, որ 2021 թվականի մայիսի 12-ից ադրբեջանական զինուժը ներխուժել է Հայաստանի ինքնիշխան տարածք։ Նրանք գտնվում են Սյունիքի Սև լճի շրջանում՝ փորձելով ամրապնդվել այնտեղ, ինչպես նաև Գեղարքունիքի մարզում։
Մայիսի վերջին ՀՀ վարչապետ Նիկոլ Փաշինյանն ադրբեջանական կողմին առաջարկել էր զորքերը հայելային եղանակով հետ քաշել և այդ հատվածում միջազգային դիտորդներ տեղակայել սահմանների հետագա հստակեցման նպատակով: Առաջարկը դեռ անտեսվում է։