Արագ ու համեղ․ հանգստյան օրը սկսում ենք նարնջի կեքսով

ԵՐԵՎԱՆ, 30 հունվարի – Sputnik. Հայտնի սննդաբան, բլոգեր Հեղնար Շալունցը, որը հաճախ է համեղ ու օգտակար բաղադրատոմսեր հրապարակում սոցցանցում, առաջարկում է հանգստյան օրը շատ արագ թխվող նարնջով կեքս պատրաստել։ Համեղ բաղադրատոմսն ու պատրաստման ընթացքը Շալունցը հրապարակել է Instagram–ի իր էջում։

«Բաղադրատոմսը շատ հեշտ է ու վստահ եմ բոլորիդ մոտ կստացվի»,-գրել է Շալունցը։

Նա թվարկել է անհրաժեշտ բաղադրիչները.

• Ձու -2 հատ,

• Շաքարավազ -150 գրամ,

• Նարինջ- 1հատ

• Ալյուր - 150 գրամ (կամ մի փոքր ավել, մինչև ստանաք թթվասերի նման զանգված)

• Կարագ(հալեցված)- 100 գրամ

• Մածուն -1 բաժակ

• Սոդա -1 թ/գ

• Շաքարի փոշի

Պատրաստման եղանակը

Ձվին ավելացնում ենք շաքարավազն ու հարում։ Մածունին ավելացնում ենք սոդա, խառնում ու լցնում զանգվածի վրա, շարունակում հարել։ Քերում ենք նարինջի կեղևն այնպես, որ դառը, սպիտակ հատվածը շրջանցենք։ Այնուհետև քամում ենք նարինջն ու հյութն ավելացնում զանգվածին։ Լցնում ենք հալեցված կարագն ու ալյուրը։

Թխում ենք 180 c տաքացված ջեռոցում 30-35 րոպե:

Բարի ախորժակ։